Հայաստանի նախնական (արհեստագործական) և միջին մասնագիտական կրթական համակարգում մի շարք բարեփոխումներ են իրականացվում: Ինչպես «Արմենպրես»–ի մամուլի սրահում հրավիրված ասուլիսում նշեց ՀՀ կրթության և գիտության նախարարության նախնական (արհեստագործական) և միջին մասնագիտական կրթության վարչության պետ Արտակ Աղբալյանը, դրանք հիմնականում միջազգային դոնոր կազմակերպությունների կողմից իրականացվող ծրագրերն են:
«Մեր ոլորտում այսօր գործունեություն իրականացնող դոնոր կազմակերպությունների թիվը հասնում է տասի, իսկ մեկուկես տարի առաջ աշխատում էին ընդամենը մեկ-երկուսը»,- ասաց նա:
Նոր ծրագրերից է Գերմանիայի տնտեսական համագործակցության և զարգացման նախարարության աջակցությամբ իրականացվող «Դուալ» կրթական ծրագիրը: Արտակ Աղբալյանը նշեց, որ այն կիրականացվի փորձնական կարգով հանրապետության չորս ուսումնական հաստատություններում՝ չորս մասնագիտությունների գծով:
«Դուալ» կրթական ծրագիրը ենթադրում է երկակի կամ աշխատանքի ուսուցում, երբ ուսումնական գործընթացին զուգահեռ կիրականացվի նաև կոնկրետ պրակտիկայի վրա հիմնված ուսուցում: Այսինքն` հնգօրյա ուսուցման ընթացքում երկու կամ երեք օր ուսանողները կանցկացնեն քոլեջում կամ ուսումնարանում, մնացած երկու օրը՝ կոնկրետ գործատուի մոտ՝ կոնկրետ մասնագիտության գծով և ավելի պրակտիկ գիտելիքներ կստանան»,- նշեց Արտակ Աղբալյանը:
Նրա խոսքով՝ նախկինում անցկացվող ուսուցումը հիմնականում տեսական էր, իսկ որոշակի ժամաքանակով տրվող պրակտիկաներն ավելի ձևական բնույթ էին կրում:
«Այս պիլոտային ծրագրում ընդգրկված ուսումնական հաստատություններն են Տավուշի տարածաշրջանային քոլեջը (ավտոմեխանիկների, ավտոէլեկտրիկների պատրաստման գործընթաց), Վայոց Ձորի տարածաշրջանային քոլեջը (գինեգործություն), Երևանի հումանիտար քոլեջը (տուրիզմ), Շիրակի տարածաշրջանային քոլեջը (ՏՏ ոլորտ)»,- ասաց նա:
Արտակ Աղբալյանը նշեց, որ այս հաստատություններից յուրաքանչյուրն ունեն իրենց հստակ գործընկերը գործատուների դաշտում: Շիրակում Գյումրու տեխնոպարկն է, Եղեգնաձորում՝ գինեգործական ընկերությունները, Երևանում՝ մի քանի հայտնի հյուրանոցներ, իսկ Տավուշի մարզի Ենոքավանում տուրիզմի ոլորտում գործունեություն ծավալող հայտնի ընկերություն է: Հետագայում փորձ է արվելու այս չորս մասնագիտությունների թիվն ավելացնել և «Դուալ» կրթական ծրագրում նորերը ընդգրկել:
Ոլորտում իրականցվող հաջորդ ծրագիրը ԵՄ բյուջետային աջակցությամբ է իրականացվում և ուղղված է գյուղատնտեսական մասնագիտությունների զարգացմանը՝ աշխատանքի վրա հիմնված ուսուցման ձևով: Ծրագիրն արդեն սկսված է և կավարտվի 2020 թվականին:
Իրականացվում է ծրագիր նաև «Սեյվ դը չիլդրեն» կազմակերպության հետ, որն ավելի շատ ուղղված է մասնագիտական կրթության ոլորտում ներառական կրթությանը:
