Ազգային ժողովի ՀՀԿ խմբակցության պատգամավոր Հրայր Թովմասյանը Հայաստանի ֆուտբոլի ազգային հավաքականի վերջին անհաջողություններում չի տեսնում ֆեդերացիայի նախագահ Ռուբեն Հայրապետյանի մեղքը: Ազգային ժողովում լրագրողների հետ զրույցում պատգամավորը, անդրադառնալով ֆուտբոլի աշխարհի 2018 թ. առաջնության ընտրական փուլում Հայաստանի ազգային հավաքականի անհաջող ելույթներին, նշեց, որ իր համար ցավալի է հավաքականին նման վիճակում տեսնելը, սակայն հույս հայտնեց, որ արդեն 2020 թ. Եվրոպայի առաջնության ընտրական փուլում թիմն ավելի հաջող հանդես կգա: «Այս անհաջողություններում բացարձակ չեմ տեսնում Ռուբեն Հայրապետյանի մեղքի բաժինը: Մենք մտերիմներ ենք, ընկերներ ենք: Եթե դուք շփվեք նրա հետ, տեսնեք, թե ինչ սրտացավությամբ է նա անում իր աշխատանքը, որքան ծանր է տանում մեր թիմի պարտությունները, կհասկանաք, թե ինչու եմ այսպես մտածում: Անցած տարիների ընթացքում հայկական ֆուտբոլի զարգացմանը միտված ներդրումները և աշխատանքները, որոնք կատարվել են, անմիջականորեն կապված են Հայաստանի ֆուտբոլի ֆեդերացիայի գործունեության հետ»,- «Արմենպրես»–ի փոխանցմամբ՝ նշեց Թովմասյանը:
Հրայր Թովմասյանը չհամաձայնեց դիտարկման հետ, թե ՀՖՖ նախագահին փոխելը կարող է բարելավել իրավիճակը: Նրա խոսքով՝ ավելի կարևոր է, որպեսզի կարողանանք դրսի առաջնություններում հանդես եկող ֆուտբոլիստների բերել հավաքական: Այս առումով կարևոր է, որպեսզի Ռուսաստանի առաջնությունում հանդես եկող հայ ֆուտբոլիստները, գալով Հայաստանի հավաքական, լեգիոներ չհամարվեն իրենց առաջնությունում: «Այդ ուղղությամբ ֆեդերացիան էլ աշխատանքներ տարել է, և ԵԱՏՄ կոմիտեն արդեն իսկ նման որոշում ընդունել է: Դա մեզ հնարավորություն կտա Ռուսաստանի առաջնությունում հանդես եկող ֆուտբոլիստներին բերել հավաքական, իսկ Ռուսաստանի առաջնության մակարդակը էականորեն բարձր է մեր առաջնության մակարդակից»,- նշեց պատգամավորը:
Նա ընդհանուր առմամբ գոհ է Հայաստանի ֆուտբոլի ֆեդերացիայի կատարած աշխատանքից: «Ինչ վերաբերում է ֆեդերացիային, ապա այն ներդրումները, այն աշխատանքները, որ կատարվել են, ահռելի են: Եթե դուք երբևէ լինեք ֆուտբոլի ակադեմիայում, տեսնեք պայմանները, կհասկանաք, որ շատ երկրներ կերազեին նման ենթակառուցվածքներ ունենալ: Այս տարիների ընթացքում կառուցվել են Շիրակի, Վանաձորի, կառուցվում է Արմավիրի ֆուտբոլի ակադեմիաները: Սրանք լուրջ ներդրումներ են, որոնք իրենց արդյունքը պիտի տան: Ֆուտբոլով շատ ավելի մեծ թվով երեխաներ պետք է զբաղվեն, և հուսանք, որ նրանցից նոր Հենրիխ Մխիթարյաններ պիտի դուրս գան»,- ընդգծեց Հրայր Թովմասյանը:
Նա հավելեց, որ եվրոպական շատ հայտնի թիմերի ակադեմիաներում ևս մարզվում են պատանի հայ ֆուտբոլիստներ՝ ընդգծելով, որ պետք է սպասենք նաև նրանց հավաքական բերելու հնարավորությանը: Հրայր Թովմասյանը նաև նշեց, որ շատ կարևոր է Հայաստանի առաջնության մակարդակի բարձրացումը՝ շեշտելով, որ բարձրագույն խմբում ընդամենը 6 թիմ է հանդես գալիս, իսկ դա բավարար չէ:
Հայաստանի ֆուտբոլի ազգային հավաքականը աշխարհի 2018թ. առաջնության ընտրական փուլում անցկացրած 9 հանդիպումներից 7-ում պարտվել է՝ տանելով ընդամենը երկու հաղթանակ: Հայաստանի հավաքականը 6 միավորով զբաղեցնում է E խմբի նախավերջին հորիզոնականը՝ գերազանցելով միայն Ղազախստանի ընտրանուն: Կրած 7 պարտություններից 5-ում Հայաստանի հավաքականը խաղերը տանուլ է տվել խոշոր հաշիվներով:
