Ոսկերչական զարդեր, ադամանդներ, ժամացույցներ, բիժուտերիա. «Երևան շոու-2017» միջազգային մասնագիտացված ոսկերչական ցուցահանդեսը համախմբել է շուրջ 70 ընկերություն` 6 երկրներից:
Ավետիս Քենդին, ով 45 տարի Թուրքիայում ոսկեգործության ոլորտում է աշխատում, առաջին անգամ իր ապրանքները ներկայացնում է Հայաստանում:
«Ես երկար տարիներ այս ոլորտում եմ, իմ աշխատանքները մեծ ճանաչում ունեն, պատվերներ ունենք Լոնդոնից, Փարիզից, Նյու Յորքից: Այսօր Հայաստանում եմ իմ ապրանքները ներկայացնում, ամբողջը հնարավոր չէր բերել, բայց հետաքրքիր զարդեր, արձանիկներ ցուցադրված են»,- «Արմենպրես»-ի հաղորդմամբ՝ ասաց նա:
Ավետիս Քենդին Հայաստան է եկել համագործակցության ակնկալիքով: Հայաստանում նախատեսում է հիմնել դպրոց, որ աշակերտներին սովորեցնի իր արհեստը:
Սիրիահայ Նազարեթ Արոյանը, ով «Նազո Արոյան» ընկերության ղեկավարն է, ցուցահանդեսին ներկայացնում է սիրիահայ ոսկերիչների ձեռքի աշխատանքը:
«Հալեպում ես մեծ խանութ ունեի, այնտեղ վաճառում էի պարսկական գորգեր, հայ ոսկերիչների ձեռքի աշխատանքներ: Հայ ոսկերիչների աշխատանքը մեծ պահանջարկ ուներ, հատկապես հետաքրքրված էին զբոսաշրջիկները: Ինչ կարողացել, բերել եմ Հայաստան, այժմ տեղի բնակիչները հնարավորություն ունեն տեսնել, գնել»,-ասաց Նազարեթ Արոյանը:
Գևորգ Դախտաջյանը ևս սիրիահայ է: Նա Հայաստանում գործունեություն է ծավալում արդեն 15 տարի: Մասնակցել է աշխարհի տարբեր երկրներում անցկացված միջազգային ցուցահանդեսներին:
«Եղել եմ նաև Հայաստանում: Երբ տարիներ առաջ իմ աշխատանքները ներկայացրեցի Հայաստանում, տեղացիները շատ հավանեցին գործերս: Այնուհետև ընտանիքում որոշեցինք փոքր արտադրամաս հիմնել և այդպես ընդլայնվեցինք»,-ասաց նա: Գևորգ Դախտաջյանի հայրը ոսկերիչ է, այժմ շարունակում է նրա գործը: Սիրիայում Դախտաջյանների աշխատանքը մեծ պահանաջարկ ուներ, արտահանվում էր արաբական երկրներ: Գևորգ Դախտաջյանը նշեց, որ առաջիկայում ևս նախատեսում են աշխատել արտահանման ուղղությամբ:
Ցուցահանդեսը բաց է լինելու մինչև հոկտեմբերի 8-ը: «Երևան շոու-2017» ցուցահանդեսի հետ միաժամանակ Էքսպո-կենտրոնում տեղի կունենա մեկ այլ նշանակալի իրադարձություն՝ «YerevanFashionWeek» նորաձևությանշաբաթ երրորդ սեզոնի բացումը: Ծրագրի հիմնական գաղափարը պոդիումից ինչպես հագուստի դիզայներական, այնպեսէլԵԱՏՄ երկրների դիզայներական բրենդների ոսկերչական զարդերի հավաքածուներ ներկայացնելն է: Էքսպո-կենտրոնում՝որպես ավանդույթ,ներկայացված են լինելու նաև Հայաստանի նկարիչների միության գեղանկարչական աշխատանքներ:
