Պետական եկամուտների կոմիտեի օպերատիվ հետախուզության վարչությունը 2017 թվականի հունվար-սեպտեմբեր ամիսներին իրականացվել է շուրջ 2000 միջոցառում, որոնց արդյունքում արձանագրվել է 2.2 մլրդ դրամ բյուջե լրացուցիչ վճարման ենթակա գումար:
«Արմենպրես»–ի հաղորդմամբ՝ լրագրողների հետ զրույցում ամփոփելով նախորդ գործունեության 9 ամիսների արդյունքները՝ այս մասին տեղեկացրեց ՀՀ կառավարությանն առընթեր պետականեկամուտների կոմիտեի նախագահ Վարդան Հարությունյանը:
«Իրացվող ապրանքների և մատուցվող ծառայությունների հետ կապված գործարքների համատարած փաստաթղթավորման ապահովման նպատակով իրականացվել է 997 օպերատիվ-հետախուզական միջոցառում, կազմվել 466 մլն դրամի վարչական ակտ: Անապրանք գործարքների հատկանիշներով հայտնաբերվել է 33 դեպք, 16 նյութերի հիման վրա հարուցվել է քրեական գործ: Ապօրինի ձեռնարկատիրության բացահայտման նպատակով իրականացվել է 213 օպերատիվ-հետախուզական միջոցառում, որի արդյունքում կազմվել են 102 մլն դրամ ընդհանուր գումարով վարչական ակտեր»,-ասաց նա:
Վարդան Հարությունյանը նաեւ տեղեկացրեց, որ նախորդ ամիսներին հայտնաբերվել է առանց համապատասխան լիցենզիայի գործունեության իրականացման 30 դեպք, որոնց հիման վրա կազմվել են վարչական ակտեր և տնտեսավարող սուբյեկտներին առաջադրվել է պետական բյուջե վճարման ենթակա 20 մլն դրամի գումար:
«Իրավապահ մարմինների պահանջով իրականացվել է պետական բյուջեի հետ փոխհարաբերությունների ճշտության 54 ստուգում, որոնց արդյունքում արձանագրվել է բյուջե լրացուցիչ վճարման ենթակա 1.7 մլրդ դրամ»,- հավելեց ՊԵԿ նախագահը:
Վարդան Հարությունյանի խոսքով՝ ՊԵԿ օպերատիվ հետախուզության վարչությունը 601 այլ միջոցառում է իրականացրել՝ ուղղված հարկերից չարամտորեն խուսափելու, կեղծ սնանկության, փոխկապակցվածության, ապրանքի տեսականու և քանակի անհամապատասխանության, ներմուծում-իրացում եւ այլ դեպքերի բացահայտմանը:
