Սոցիալապես անապահով ընտանիքների համար ինքնուրույնաբար կայուն եկամտի ձևավորման իրական հնարավորությունների ստեղծման և դեպի պետական նպաստն առկա ձգտումների առավելագույնս ապախթանման նպատակով արմատապես վերանայվել է ընտանիքների անապահովության գնահատման կարգը:
Այս մասին տարեկան ամփոփիչ ասուլիսում նշեց ՀՀ աշխատանքի և սոցիալական հարցերի նախարար Արտեմ Ասատրյանը: «Նոր կարգում հնարավորինս ներառվել են տնտեսապես ակտիվ անձանց աշխատանքի շուկայում ունեցած վարքագծի գնահատականները՝ դրանով խթանելով աշխատանքային գործունեություն ծավալելու իրենց ցանկությունը, ինչպես նաև ավելացել է երեխա ունեցող ընտանիքների անապահովության գնահատման հարցում երեխաների առկայության հանգամանքի կշիռը` դիտարկելով նման ընտանիքները աղքատության տեսանկյունից ավելի ռիսկային»,- «Արմենպրես»–ի փոխանցմամբ, ասաց նախարարը: Նրա խոսքով, ինտեգրված սոցիալական ծառայությունների համակարգի ներդրման, մասնավորապես սոցիալական աշխատանքի ինստիտուտի կայացման ուղղությամբ մշակվել և ՀՀ կառավարության քննարկմանն են ներկայացվել «Սոցիալական աջակցության մասին» ՀՀ օրենքում փոփոխություններ և լրացումներ կատարելու մասին», «Պետական նպաստների մասին» ՀՀ օրենքում փոփոխություններ և լրացումներ կատարելու մասին» և «Սոցիալական աշխատանքի մասին» ՀՀ օրենքների նախագծերը: Միաժամանակ, մշակվել է «Գնահատված սոցիալական կարիքների հիման վրա սոցիալական ծառայությունների տրամադրման գործառնական հենքի ձևավորում» պրոյեկտը, որով նախատեսված միջոցառումների իրականացումն ընթացքի մեջ է:
