Բուլղարիայում ՀՀ դեսպան Արմեն Սարգսյանի հրավերով սեպտեմբերի 27-ին դեսպանություն էին այցելել սպորտի բնագավառում համաշխարհային ճանաչում ունեցող և Բուլղարիայի սպորտային կյանքում ակտիվորեն ներգրավված հայազգի մարզիկներ` ըմբշամարտի աշխարհի և Օլիմպիական խաղերի կրկնակի չեմպիոն Արմեն Նազարյանը (ներկայումս` ԲՀ ըմբշամարտի հավաքականի գլխավոր մարզիչ), ծանրամարտի Օլիմպիական խաղերի կրկնակի չեմպիոն, ԲՀ ծանրամարտի ֆեդերացիայի նախկին նախագահ Նորայր Նուրիկյանը (ներկայումս` ԲՀ ծանրամարտի ֆեդերացիայի խորհրդի անդամ), բադմինթոնի աշխարհի առաջնությունների բազմակի մեդալակիր Բյուզանդ Կասաբյանը (ներկայումս` ԲՀ բադմինթոնի ֆեդերացիայի նախագահ, ՀՀ բադմինթոնի ֆեդերացիայի պատվավոր նախագահ) և թենիսի Բուլղարիայի բազմակի չեմպիոն և աշխարհի առաջնությունների մեդալակիր Յուլիա Բերբերյանը (ներկայումս` Սոֆիայի «Մալեև» ակումբի գլխավոր մարզիչ): Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Ողջունելով հյուրերին` դեսպան Սարգսյանը տեղեկացրեց, որ Հայաստան-Բուլղարիա երկկողմ համագործակցության ակտիվացման պայմաններում կարևոր է նաև սպորտի բնագավառում փոխգործակցության խորացումը, որում անկասած առկա է անվանի բուլղարահայ մարզիկների ունեցած մեծ փորձի և լայն հնարավորությունների օգտագործման անհրաժեշտությունը:
Հյուրերն իրենց տեսլականը ներկայացրին սպորտի տարբեր բնագավառներում երկկողմ համագործակցության հաստատման և զարգացման ուղիների ու դրան հասնելու միջոցների մասին:
Դեսպան Սարգսյանը նշեց, որ ոլորտում համագործակցության հետագա զարգացման հետ կապված հարցերն ու գործնական առաջարկությունները նպատակահարմար է ընդգրկել երկու երկրների սպորտի նախարարությունների օրակարգում` մշակելով համապատասխան աշխատանքային ծրագրեր:
Հայազգի մարզիկները խոստացան գործուն միջոցներ ձեռնարկել նման աշխատանքային ծրագրերի իրականացման հարցում, ինչը կբարձրացնի երկու երկրների առանձին սպորտաձևերի ազգային ֆեդերացիաների միջև փոխգործակցության արդյունավետությունը:
