Արցախի Հանրապետութեան արտաքին գործոց նախարարութեան տեղեկատուութեան եւ հասարակայնութեան հետ կապերու վարչութիւնը յայտարարութիւն տարածած է Իրաքեան Քիւրտիստանի մէջ Սեպտեմբեր 25-ին տեղի ունեցած անկախութեան հանրաքուէի վերաբերեալ:
Յայտարարութեան մէջ կ’ըսուի.
«Կ’ողջունենք Իրաքեան Քիւրտիստանի անկախութեան հանրաքուէի իրականացումը` իբրեւ ՄԱԿ Կանոնադրութեամբ եւ շարք մը միջազգային հիմնարար փաստաթուղթերով ամրագրուած ժողովուրդներու ինքնորոշման եւ իրենց զարգացման ուղին ինքնուրոյն ընտրելու իրաւունքի իրացման արարք:
«Յուսով ենք, որ հանրաքուէի արդիւնքով ստեղծուած իրավիճակը կը կարգաւորուի խաղաղ միջոցներով` հաշուի առնելով տարածաշրջանին մէջ կայունութեան եւ անվտանգութեան ապահովման անհրաժեշտութիւնը»:
