Լուսանկարչական արվեստի սիրահարներն առաջիկա օրերին հնարավորություն կունենան ծանոթանալ ֆոտոլրագրող Ռաֆայել Համբարձումյանի աշխատանքներին: Սեպտեմբերի 22-ին «ՀԱՅ-ԱՐՏ» մշակութային կենտրոնում տեղի ունեցավ լուսանկարչական ցուցահանդեսի բացման արարողությունը, որում ներկայացված են Լոս-Անջելեսում բնակվող հայազգի ֆոտոլրագրող Ռաֆայել Համբարձումյանի աշխատանքները:
«Արմենպրես»–ի հետ զրույցում Ռաֆայել Համբարձումյանը նշեց, որ ինքը կրթություն չի ստացել, պարզապես սիրել է լուսանկարել ու սեփական ջանքերով վարպետացել է այդ գործի մեջ: «Առաջին մեդալը ստացել եմ 1957թ., իսկ դրանից հետո սկսել եմ աշխատել Հայաստանի տարբեր թերթերի համար: Իմ նկարները շատ էին սիրում, անգամ կային խմբագրություններ, որ արտատպում էին իմ աշխատանքները: Նույնիսկ Կենտկոմն էր իմ նկարների նկատմամբ հետաքրքրություն ցուցաբերում»,- ասաց Համբարձումյանը:
Համբարձումյանը պատմեց, որ իր «Երեկոյան Երևան» լուսանկարը, որն արել է 50 տարի առաջ, Կարեն Դեմիրճյանի ամենասիրած նկարներից մեկն է եղել, որը նա փակցրել էր իր աշխատասենյակի պատին: «Ինձ միշտ ասում էր, որ ամեն անգամ նայում է այդ նկարին ու հիանում»,- պատմեց նա:
Նա նշում է, որ ինքը լուսանկարում է ոչ թե ուղղակի լուսանկարելու համար, այլ փորձում է ստեղծագործել: «Միշտ փորձել եմ այնպես լուսանկարել, որ իմ աշխատանքն ասելիք ունենա»,- ասաց լուսանկարիչը:
Ռաֆայել Համբարձումյանը 1999 թ. տեղափոխվել է ԱՄՆ, որտեղ շարունակել է ստեղծագործական աշխատանքը: Նա մասնակցել էտարբեր ցուցահանդեսների աշխարհի տարբեր երկրներում` Անգլիայում, Ֆրանսիայում, Իտալիայում, ԱՄՆ–ում և այլն: Ռաֆայել Համբարձումյանը օրերս Երևանում մասնակցել է նաև «Հայաստան–Սփյուռք» 6-րդ համաժողովին:
