ԱՄՆ քոնկրէսի ներկայացուցիչներու պալատի հայ գործիչ Աննա Էշուն վստահ է, որ ԱՄՆ-ն պարտաւոր է ճանչնալու Հայոց Ցեղասպանութիւնը: Ըստ «Armenpress.am»-ի՝ ան այս մասին ըսած է Ազգային ժողովի մէջ` ի պատասխան լրագրողներու հարցին, թէ հնարաւո՞ր է, որ ԱՄՆ-ն ճանչնայ Հայոց Ցեղասպանութիւնը Տանըլտ Թրամփի վարչակազմի օրով:
«Մեզմէ շատերը չեն դադրիր աշխատելու այս ուղղութեամբ: Մենք պիտի շարունակենք մեր ջանքերը, որպէսզի Ամերիկայի Միացեալ Նահանգները միանայ միջազգային հանրութիւնը ներկայացնող այն մեծաթիւ երկիրներուն, որոնք արդէն իսկ ճանչցած են Հայոց Ցեղասպանութիւնը: Ատիկա անցեալի սարսափի մասին է, սակայն, ես նաեւ կը կարծեմ, որ մեր այցը կ’առնչուի մեր ապագային ու հայ-ամերիկեան գործընկերութեան, տնտեսական կապերու ամրապնդման: Ատիկա ո՛չ միայն Հայաստանի եւ հայերու, այլեւ կը բխի Ամերիկայի շահերէն»,- ըսած է ԱՄՆ քոնկրէսականը:
