«Հայաստանի մանուկներ» հիմնադրամը իր գործունեության 14 տարիների ընթացքում օգնություն է տրամադրել 44 գյուղերի:«Արմենպրես»-ի հաղորդմամբ՝ լրագրողների հետ զրույցում այս մասին ասաց հիմնադրամի հիմնադիր Գարո Արմենը: Նրա խոսքով՝ արդեն իսկ 44 գյուղերում իրականացվել են կրթական, առողջապահական, սոցիալական և տնտեսական ծրագրեր
«Այն ժամանակ նկատեցինք, որ երեխաները չունեն միջոցներ իրենց կարողությունները օգտագործելու համար, ուստի մենք տրամադրեցինք այդ միջոցները: 14 տարվա ընթացքում արդեն 44 գյուղերում այդ աշխատանքները իրականացվել են, սակայն ցանկանում ենք մեր գործունեությունը ընդլայնել այլ գյուղերում: Դրա համար մենք ստեղծեցինք ՍՄԱՐԹ մոդելը»,- ասաց Գարո Արմենը:
Նրա խոսքով՝ հայ ժողովուրդը շատ աշխատասեր է, սակայն աշխատասիրությունը պետք է ճիշտ օգտագործվի, ուստի ՍՄԱՐԹ մոդելը հենց դրան է միտված:
«20 ՍՄԱՐԹ կենտրոն կառուցելու համար անհրաժեշտ է 200 միլիոն դոլար: Այն չնչին գումար է մեծահարուստ հայ բարերարի համար, սակայն խիստ անհրաժեշտ գյուղական համայնքներին»,- նշեց Գարո Արմենը:
