Շաբաթ մը առաջ, Եկեղեցիներու Համաշխարհային Խորհուրդի Միջին Արեւելքի ընդհանուր պատասխանատու նշանակուեցաւ Գարլա Խիճոյեանը։ Շրջանի որպէս պատասխանատու անոր պարտաւորութիւնները կ՚ընդգրկեն եկեղեցիներու հետ յարաբերութիւններու մշակում, Միջին Արեւելքին առնչուած Եկեղեցիներու Համաշխարհային Խորհուրդի ծրագիրներու ճշդում ու հետապնդում, ինչպէս նաեւ յատուկ նախաձեռնութիւններու իրագործում։
Գարլա Խիճոյեանի կենսագրականը հարուստ է։ Ան եղած է Մեծի Տանն Կիլիկիոյ Կաթողիկոսութեան հովանին վայելող Հայ Եկեղեցւոյ Համալսարանականներու Ուսանողական Միութեան (ՀԵՀՈՄ) ատենապետուհին, Լիբանանի քրիստոնեայ միութեան ատենապետուհին եւ համաշխարհային քրիստոնեայ ուսանողներու միութեան կեդրոնական վարչութեան մէջ Լիբանանի ներկայացուցիչ։ Ան տարբեր առիթներով երիտասարդութեան առնչուած միջ-եկեղեցական ժողովներուն մեր Ս. Աթոռը ներկայացուցած է, իսկ անցնող վեց տարիներուն ընթացքին, Եկեղեցիներու Համաշխարհային Խորհուրդի երիտասարդաց բաժնի պատասխանատուի պաշտօնը վարած է։
Խիճոյեան ֆրանսական գրականութիւն դասաւանդած է Պէյրութի Նշան Փալանճեան Ճեմարանին մէջ եւ կը տիրապետէ արաբերէն, ֆրանսերէն ու անգլերէն լեզուներուն։
Հինգշաբթի, 8 Սեպտեմբեր 2017-ին, Գարլա Խիճոյեանը ներկայացաւ Ն.Ս.Օ.Տ.Տ. Արամ Ա. Վեհափառ Հայրապետին ստանալու իր օրհնութիւնը։ Նորին Սրբութիւնը ողջունելով այս կարեւոր պաշտօնին նշանակումը ու գնահատելով անոր կատարած աշխատանքը՝ մաղթեց որ շարունակէ վերանորոգ նուիրումով ներկայացնել Հայ Եկեղեցին։
