Հայաստանի ազգային ֆիլհարմոնիկ նուագախումբէն կը տեղեկացնեն, որ Սեպտեմբեր 11-էն Հոկտեմբեր 27 սիմֆոնիկ եւ կամերային համերգներով Արամ Խաչատրեան համերգասրահին մէջ պիտի հիւրընկալուին 20-է աւելի հանրայայտ մենակատարներ աշխարհի տարբեր երկիրներէ: Փառատօնի գեղարուեստական ղեկավարներն են Էդուարդ Թօփչեան եւ Ալեքսանդր Չաուշեան:
Բացման համերգը կը կայանայ Սեպտեմբեր 11-ին Արամ Խաչատրեան համերգասրահին մէջ: Նուագախումբին հետ ելոյթ պիտի ունենան իտալացի հանրայայտ կլարնեթահար Ալեխանտրօ Քարպոնարէն եւ 15-ամեայ հրաշամանուկ դաշնակահար Ալեքսանդր Մալոֆէեւը (Ռուսիա): Ծրագրին մէջ` Մոցարտ, Չայկովսքի եւ Պորոտին: Խմբավար` Էդուարդ Թօփչեան:
Փառատօնի ծիրէն ներս տեղի պիտի ունենան քանի մը յոբելենական համերգներ. Սեպտեմբեր 18-ին պիտի նշուի Յովհաննէս Այվազովսկիի 200-ամեակը, Սեպտեմբեր 24-ի համերգով` ՀՀ Անկախութեան օրը: Սեպտեմբեր 29-ին յոբելեանական մեծ համերգով Ֆիլհարմոնիկը պիտի տօնէ մեծ ջութակահար Ռուբէն Ահարոնեանի ծննդեան 70-ամեակը:
Յոբելեանական պիտի ըլլայ նաեւ փառատօնի փակման համերգը. Հոկտեմբեր 27-ին պիտի տօնուի մեծ խմբավար Օհան Դուրեանի 95-ամեակը:
Առանձնայատուկ համերգներ տեղի պիտի ունենան Հոկտեմբեր 6-ին, երբ պանտոնէոնահար Փապլօ Մաինեթթին ֆիլհարմոնիկի լարային կազմին հետ պիտի ներկայացնէ արժենթինական թանկոյի երեկոյ (պիտի ըլլան նաեւ պարային կատարումներ) եւ Հոկտեմբեր 12-ին, երբ բեմի վրայ «մարտի պիտի բռնուին» երկու գերմանացի դաշնակահարներ` ներկայացնելով «դաշնամուրամարտ» ստեղծագործութիւնը:
Ընդհանուր առմամբ, պիտի կայանան մէկը միւսէն հետաքրքրական ու բազմագոյն 12 համերգներ: Իսկ փորձերէն ու համերգներէն ետք հիւր մենակատարները վարպետութեան դասեր պիտի ունենան հայ սկսնակ երաժիշտ-կատարողներու հետ:
Կազմակերպիչները կը նշեն, որ Հայաստանի Ազգային ֆիլհարմոնիկ նուագախումբը Երեւանեան 11-րդ միջազգային երաժշտական փառատօնը տեղի կ’ունենայ Հայաստանի նախագահի տիկին Ռիթա Սարգսեանի բարձր հովանիին ներքոյ եւ Մշակոյթի նախարարութեան աջակցութեամբ :
