ԵՄ-Հայաստան համաձայնագիրը նոր էջ կբացի երկկողմ հարաբերություններում: «Արմենպրես»-ի հաղորդմամբ՝ այս մասին, Օրգանական գյուղատնտեսության աջակցության նախաձեռնությանը նվիրված ասուլիսի շրջանակում պատասխանելով լրագրողների հարցերին հայտարարեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
«Մենք պատրաստվում ենք համաձայնագրի ստորագրմանը, շարունակում ենք ներքին նախապատրաստական աշխատանքները, եւ ես հայկական կողմից դեռ որեւէ նշան չեմ տեսել, որը կհակասեր մեր համատեղ միտվածությանը եւ ծրագրերին: Հստակ գնում ենք դեպի ընդհանուր նպատակի իրականացում: Հուսամ՝ այս համաձայնագրի շրջանակում կաջակցենք միմյանց՝ համագարծակցությունը տանելու դեպի նոր մակարդակներ նաեւ հենց գյուղատնտեսության ոլորտում: Ես մեծապես հավատացած եմ, որ հայկական օրգանական գյուղատնտեսական ոլորտը կտարածվի դեպի Եվրոպա: Մենք հետագայում էլ ավելի խորացված աջակցություն կցուցաբերենք գյուղատնտեսության ոլորտին»,-ասաց նա:
ԵՄ-Հայաստան համաձայնագրի ստորագրումը նախատեսվում է նոյեմբերին՝ Արեւելյան գործընկերության՝ Բրյուսելում կայանալիք գագաթնաժողովի շրջանակում:
