Սեպտեմբերին նախատեսված են բազմաթիվ փառատոններ, միջոցառումներ, քանի որ ամիսը հագեցած է զբոսաշրջիկներով: «Արմենպրես»–ի հաղորդմամբ՝ սեպտեմբերի 8-ին լրագրողների հետ հանդիպմանն «Արենի փառատոն»հիմնադրամի տնօրեն Նունե Մանուկյանըներկայացրեց մոտակա ժամանակում սպասվելիք փառատոնները:
«Փորձում ենք յուրաքանչյուր ամիս կազմակերպել այնպիսի փառատոններ, որոնց շնորհիվ զբոսաշրջիկներն առնչվեն ժողովրդի կենցաղի, ուտեստի, երաժշտության հետ:Մայիսին Սարյան փողոցում անցկացված «Գինու օրերը» լայն արձագանք ունեցավ, և որոշեցինք դարձյալ կազմակերպել նմանատիպ փողոցային փառատոններ»,-ասաց Նունե Մանուկյանը:
Նրա խոսքով՝ Երևանի քաղաքապետարանի հետ համատեղ սեպտեմբերի 16-ին նախաձեռնել են Yerevan music night միջոցառումը: Այն տեղի կունենա Թումանյան-Աբովյան խաչմերուկում: Երեկոյան ելույթ կունենա արտերկրից ժամանած ճանաչված աստղ:
«Նույն օրը Արցախում կանցկացվի Գինու փառատոնը: Այս տարի ավելի շատ գինեգործներ ներկայացված կլինեն Հայաստանից: Իսկ սեպտեմբերի 30-ին Արենի փառատոնի հիմնադրամի նախաձեռնությամբ Խաչիկ գյուղում տեղի կունենա արդեն ավանդական դարձած Գաթայի փառատոնը»,-ասաց Մանուկյանն ու հավելեց, որ այն օգնում է սահմանամերձ գյուղին՝ դառնալու ճանաչելի: Նախորդ տարի գյուղացիները մեծ գոհունակություն են հայտնել փառատոնի արդյունքից:
Իսկ «Արենի» գինու փառատոնն այս տարի կանցկացվի հոկտեմբերի 7-ին:
