ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը կառավարության նիստից հետո անդրադարձավ Մցխեթա-Ստեփանծմինդա-Լարս ավտոճանապարհին այս գիշեր տեղի ունեցած վթարին: «Ըստ նախնական տեղեկությունների, մեղավոր է եղել Վրաստանում գտնվող վարորդը, ոչ հայկական ավտոբուսինը», – «Արմենպրես»-ի փոխանցմամբ՝ նշեց նախարարը՝ ավելացնելով, որ վթարված ավտոբուսն իրականացրել է ոչ կանոնավոր ուղևորափոխադրում։ «Դեռ օգոստոսին տույժ էր կիրառվել այդ ընկերության նկատմամբ, բայց դրանից հետո շարունակվել է ոչ կանոնավոր ուղևորափոխադրումը: Փորձը ցույց է տալիս, որ վերջին բոլոր վթարները տեղի են ունենում ոչ կանոնավոր ուղևորափոխադրումների հետևանքով», – նշեց Վ. Մարտիրոսյանը:
Նախարարը հորդորեց բոլոր քաղաքացիներին՝ օգտվել միայն կանոնավոր ուղևորափոխադրումներից՝ օրենքի դաշտում: «Պետք է շարժվել ավտոկայանից, տոմսերը գնել ավտոկայանից, որովհետև այնտեղ ստուգվում են մեքենաները, կանոնավոր ուղևորափոխադրողն ունենում է երկու-երեք վարորդ, որոնք ժամանակ առ ժամանակ փոխվում են», – նկատեց Վահան Մարտիրոսյանը։
