ՀՀ ԱԺ նախագահի տեղակալ Էդուարդ Շարմազանովը սեպտեմբերի 5-ին Ծաղկաձորում այցելել է Օրբելի եղբայրների տուն-թանգարան: Նշենք, որ այս տարի լրանում է անվանի ֆիզիոլոգ Լեւոն Օրբելու 135-ամյակը եւ ականավոր հայագետ, արեւելագետ եւ ազգագրագետ, ՀՀ գիտությունների ազգային ակադեմիայի հիմնադիր նախագահ Հովսեփ Օրբելու 130-ամյակը:
Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից,ՀՀ ԱԺ փոխնախագահը դիտել է տուն-թանգարանի ցուցադրությունը, լսել աշխատակիցների առաջարկները:
«Օրբելի եղբայրները հայ ազգի գիտական մտքի մեծություններից են, նրանցից յուրաքանչյուրն իր ոլորտում հասել է համաշխարհային բարձունքների: Նրանց գիտական ժառանգությունն անգնահատելի է»,- ընդգծել է պարոն Շարմազանովը:
Էդուարդ Շարմազանովը տեղեկացրել է, որ իր նախաձեռնությամբ սեպտեմբերի 25-26-ը Սանկտ Պետերբուրգի Տավրիդյան պալատում ԱՊՀ ԽՎ-ը կազմակերպելու է Հովսեփ Օրբելու 130-ամյակին նվիրված միջոցառումներ: Նա հավելել է նաեւ, որ հոկտեմբերին ՀՀ Ազգային ժողովում կկազմակերպվի Օրբելի եղբայրների տուն-թանգարանի ցուցանմուշների ցուցադրություն, կանցկացվի Օրբելի եղբայրների շաբաթ:
«Մենք պարտավոր ենք հիշել, մեծարել եւ ապագա սերունդներին ներկայացնել 20-րդ դարի համաշխարհային մեծության հայ երեք հռչակավոր գիտնական եղբայրներին»,-ընդգծել է Էդուարդ Շարմազանովը:
Նա նշել է նաեւ, որ Լենինգրադի շրջափակման ժամանակ Հովսեփ Օրբելին, լինելով Էրմիտաժի տնօրենը, ֆաշիստական ոչնչացումից փրկել է համաշխարհային արվեստի շատ նմուշներ: ԱԺ փոխնախագահի գնահատմամբ` Հովսեփ Օրբելին Լենինգրադի շրջափակման հաղթահարման խորհրդանիշերից է:
Տուն-թանգարանի աշխատակիցների հետ զրույցի ընթացքում Էդուարդ Շարմազանովը կարծիք է հայտնել, որ կարելի է սկսել քննարկումներ` ՀՀ ԳԱԱ արեւելագիտության կամ հնագիտության եւ ազգագրության ինստիտուտը Հովսեփ Օրբելու անունով կոչելու վերաբերյալ:
