ՀՀ տնտեսական զարգացման եւ ներդրումներու նախարար Սուրէն Գարայեան անդրադարձաւ Եւրասիական տնտեսական միութեան (ԵԱՏՄ) մաքսային տարածքին Թուրքիոյ միանալու մասին: «Մեր համապատասխան մարմինները արդէն իսկ այդ հարցին արձագանգած են: Միայն պիտի ամբողջացնեմ, որ ԵԱՏՄ-ի մէջ որոշումները կը կայացուին համախոհութեան սկզբունքով, եւ երբ կարգը հասնի որոշումներու կայացման` Հայաստանը պիտի յայտնէ իր դիրքորոշումը»,- ըսած է Գարայեանը:
Աւելի առաջ, ՀՀ արտաքին գործոց փոխնախարար Շաւարշ Քոչարեան, այս առնչութեամբ նշած էր. «Նախ, ԵԱՏՄ մաքսային տարածքին միանալու հնարաւորութիւն նախատեսուած չէ ԵԱՏՄ պայմանագիրով: Աւելին, զաւեշտալի է, երբ ԵԱՏՄ մաքսային տարածքին միանալու մասին կը խօսի Թուրքիան, որ միակողմանի փակած է հայ-թրքական սահմանը` միակ ցամաքային սահմանը Թուրքիոյ եւ ԵԱՏՄ մաքսային տարածքին միջեւ»:
Թուրքիոյ տնտեսութեան նախարար Նիհաթ Զէյպեգչին, 18 Օգոստոսին նշած էր, թէ Թուրքիան առաջարկ ունի, որպէսզի մաքսային համաձայնագրի ստորագրման վերաբերեալ բանակցութիւններ սկսի Եւրասիական տնտեսական միութեան հետ` չխախտելով համապատասխան համաձայնութիւնները Եւրոմիութեան հետ: Անոր խօսքով, Թուրքիան կ’ուզէ նաեւ այլ համագործակցութիւն հարթել ԵԱՏՄ-ի հետ:
