Միացեալ Նահանգներու արտաքին գործոց նախարարութիւնը դրամաշնորհ տրամադրած է Հայաստանի մէջ գիւղատնտեսութեան ապագային միտող ծրագիրին:
Ըստ News.am-ի՝ այս առնչութեամբ, Հայաստանի մէջ ամերիկեան դեսպանատան տարածած հաղորդագրութեան մէջ կ՛ըսուի.
«Ամէն տարի ԱՄՆ պետական քարտուղարութեան շրջանաւարտներու ներգրաւուածութեան նորարարական հիմնադրամի դրամաշնորհային ծրագիրը կ՝աջակցի ԱՄՆ փոխանակման ծրագիրներու բարգաւաճող ու ազատ հասարակութիւն կառուցող շրջանաւարտներուն:
Այս տարի ԱՄՆ պետական քարտուղարութիւնը ստացած է 1014 դիմում 125 երկրէ եւ ֆինանսաւորած է 68 նախագիծ, որոնցմէ մէկը՝ Հայաստանէն՝ Ֆուլպրայթ ուսանողական ծրագիրի շրջանաւարտներ Արմէն Ղազարեանի, Գայիանէ Սարգսեանի եւ Muskie ծրագիրի շրջանաւարտ Աստղինէ Պօղոսեանի ներկայացուցած խմբային նախագիծը:
Անոնց ACT (Վաղուայ օրը կերտող Agripreneurs) առաջարկը նպատակ ունի ձեւաւորելու Հայաստանի մէջ գիւղատնտեսութեան ապագան՝ բարձրագոյն ուսումնական հաստատութիւններու ուսանողներու համար իրականացնելով գործնական դասընթացներ յաջողակ երկրագործական գործառնութիւն սկսելու վերաբերեալ: Անհամբեր կը սպասենք նախագիծի աճին ու զարգացման»:
