Նոր ուսումնական տարին Պոլսոյ հայկական դպրոցներուն նոր անակնկալներու փոխարէն նոր տհաճութիւններ կը խոստանայ: Տեղի հայկական վարժարաններէն շատերը ուսումնական տարին պիտի սկսին առանց առաջին դասարանի աշակերտներու: Կարգ մը դպրոցներ ալ չեն կրցած հոգալ իրենց ֆինանսական խնդիրները:
Ըստ «Sputnik»-ի՝ Պոլսոյ հայկական «Ակօս» պարբերականի հայկական բաժնի խմբագիր Բագրատ էսդուգեանի խօսքով` խնդիրը ոչ թէ երեխաներու թիւի նուազումն է, այլ՝ անոնց թրքական դպրոցներ տանիլը: Այս սպառնալիքը առկայ է եւ կը սկսի մանկապարտէզներէն: «Եթէ առաջ ծնողները կը նախընտրէին երեխան նախ հայկական վարժարան տալ, յետոյ միայն` օտար, որպէսզի հայերէնի հիմքերը ամուր ըլլային, հիմա մօտեցումը փոխուած է: Ինչ որ, ի հարկէ, մերժելի եւ պախարակելի է»:
Օտար վարժարաններ ընտրելու պատճառը, Էսդուգեանի համոզմամբ, քաղքենիութիւնն է ու միայն քաղքենիութիւնը: Միւս բոլոր թուարկուող պատճառաբանութիւնները` կապուած կրթութեան որակի կամ դասագիրքերու պակասի հետ, ուղղակի այդ քաղքենիութեան ու օտարամոլութեան արդարացումներ են: Վերջին տարիներուն Սփիւռքի նոր սերունդին մէջ հայկական ամէն ինչէն հեռանալու, օտարանալու մոլուցք կայ, կը նկատէ հայկական պարբերականի խմբագիրը: Անոր խօսքով` ամբողջ աշխարհի մէջ երիտասարդ սերունդը կ’օտարանայ հայկականէն, հայոց լեզուէն: «Անոնց հիմնական մասը արդէն հայախօս չէ: Իսկ մայրենին կը սկսի ոչ թէ մանկապարտէզէն կամ դպրոցէն, այլ տունէն` մօրմէն, հօրմէն ու ընտանիքէն: Բայց մեր ընտանիքներուն մէջ, ցաւօք, սկսած է իշխող լեզուն թուրքերէնը ըլլալ, անգլերէնը կամ, ըսենք, ռուսերէնն ու ֆրանսերէնը», կ’ըսէ ան ու կ’աւելցնէ, որ կ’ըլլայ նաեւ դէպքեր, երբ խառն ամուսնութիւններու արդիւնքով ծնած երեխան կը սկսի խօսիլ հայերէն` ունենալով օտար ազգի մայրիկ: Աւելին` հայերէն կը խօսին նաեւ այլազգի մայրիկը:
Նշենք, որ Պոլսոյ մէջ կը գործէ 16 հայկական վարժարան, որոնցմէ 13-ը մասնաւոր են, 3-ն ալ կը համարուին համայնքի ընդհանուր սեփականութիւնը: Այս դպրոցներուն մէջ կրնան սորվիլ միայն հայ քրիստոնեայ ընտանիքի զաւակները` ներկայացնելով նախ մկրտութեան թուղթ:
