ՀԵԸ Անդրանիկ Անթիլիաս հանդիսաւորապէս նշեց Լիբանանի արագ եւ կայծակնային ճատրակի ախոյեանութեան տիտղոսներուն յաղթանակները, միաժամանակ ներկայացուց 6 -14 Սեպտեմբեր 2017-ին, ՀԲԸՄ-ի Տեմիրճեան կեդրոնին մէջ տեղի ունենալիք Լիբանանի ճատրակի խմբային ախոյեանութեան մասնակցող իր կազմին անդամները:
Երեքշաբթի, 22 Օգոստոս 2017, երեկոյեան ժամը 7.30-ին, ՀԵԸ Անդրանիկ Անթիլիասի ճատրակի յանձնախումբի նախաձեռնութեամբ, ի ներկայութիւն Լիբանանի ճատրակի ֆետերասիոնի նախագահ Ըզէթ Քըրէյթիմի եւ անդամներու, լիբանանեան ակումբներու ներկայացուցիչներու, ՀԵԸ-ի Կեդրոնական Վարչութեան ատենապետին եւ անդամներու, միութենականներու, մարզասէրներու, ՀԵԸ Անդրանիկ Անթիլիաս ճատրակի խումբին մարզիկներուն, ՀԵԸ Անդրանիկ Անթիլիասի Գործադիր Մարմինի ատենապետ Գրիգոր Քեշիշեան բարի գալուստ մաղթեց ներկաներուն եւ արժեւորեց Լիբանանի ճատրակի մարզաձեւին մէջ ՀԵԸ Անդրանիկ Անթիլիասի հատած փայլուն ճանապարհը:
ՀԵԸ Անդրանիկ Անթիլիասի ճատրակի յանձնախումբի պատասխնատու Տիգրան Զէյթճեան համառօտակի կատարեց ՀԲԸՄ-ի եւ ՀԵԸ-ի պատմականը, անոնց համազգային առաքելութիւնը: Տիգրան Զէյթճեան դիտել տուաւ, որ կարճ ժամանակամիջոցի մէջ, ընդամէնը 2000 թուականին հիմնուած ՀԵԸ Անդրանիկ Անթիլիասի ճատրակի դպրոցը անմիջապէս իր ուրոյն դիրքը գրաւած է Լիբանանի ճատրակի առաջին դասակարգի խումբերուն մէջ, 2015-ին դառնալով Լիբանանի փոխախոյեան, 2016-ին գրաւելով երրորդ դիրքը: Գալով այս տարուան, կայծակնային եւ արագ ճատրակի ախոյեանութեան տիտղոսներուն տիրանալէ ետք, ՀԵԸ Անդրանիկ Անթիլիաս ներկայիս կը ձգտի շահելու Լիբանանի խմբային ախոյեանութեան տիտղոսը:
Տիգրան Զէյթճեան «սլայտ շօ»ի ընկերակցութեամբ յիշարժան նկարներով եւ վիճակագրական տուեալներով համեմեց իր խօսքը, թուելով ՀԵԸ Անդրանիկ Անթիլիասի ճատրակի վարչութեան հեռանկարները:
Լիբանանի ճատրակի ֆետերասիոնի նախկին փոխնախագահ եւ ՀԵԸ Անդրանիկ Անթիլիասի խմբապետ Ռոլան Ախրաս շնորհաւորեց ճատրակի վարչութեան անդամները, մարզիկները կայծակնային եւ արագ ճատրակի ախոյեանութեան տիտղոսները նուաճելու առիթով: Ախրաս, մէկ առ մէկ ներկայացուց ՀԵԸ Անդրանիկ Անթիլիասի ճատրակի կազմին մարզիկները: Ապա ան ներկայացուց Լիբանանի ճատրակի խմբային ախոյեանութեան մասնակցող կազմին մարզիկները՝ Ֆայսալ Խէյրալլա,Անթուան Քասիս, Մանսուր Ասաֆ, Իլիաս Նատէր, Անթուան Թաամէ, Միշէլ Քարամ, Հենրի Շիտիաք, Սերժ Ուարտ,Ճոնի Անթոնիոս, Մարք Տեմիրճեան, միջազգային կարգի վարպետ Մանուէլ Պետրոսեան եւ Ռոլան Ախրաս:
Իր սրտի խօսքը փոխանցեց նաեւ Լիբանանի ճատրակի ֆետերասիոնի նախագահ Ըզէթ Քըրէյթիմը : Ան գնահատեց ՀԵԸ Անդրանիկ Անթիլիասի փայլուն յաջողութիւնները, աւելցնելով, թէ ՀԵԸ Անդրանիկ Անթիլիաս յաջողութեամբ դուրս եկած էր բոլոր մարտահրաւէրներէն: Քըրէյթիմ ներկաներուն ուշադրութեան յանձնեց իրողութիւն մը՝ ՀԵԸ Անդրանիկ Անթիլիաս իր կազմը համալրած էր Լիբանանի տարբեր շրջաններէն մարզիկներով,նաեւ ընդգրկած իգական սեռի ներկայացուցիչներ: Ան անգամ մը եւս շնորհաւորեց ՀԵԸ Անդրանիկ Անթիլիասի ճատրակի կազմը եւ պատասխանատուները զոյգ յաջողութիւններուն առիթով, միաժամանակ մաղթեց, որ ճատրակի խմբային ախոյեանութիւնը կ’ընթանայ բարձր գիտակցութեան եւ մարզական մթնոլորտի մէջ:
Ապա, տեղի ունեցաւ յուշանուէրներու յանձնում: Լիբանանի ճատրակի ֆետերասիոնի նախագահ Ըզէթ Քըրէյթիմ, ՀԵԸ-ի Կեդրոնական Վարչութեան ատենապետ Վիգէն Չերչեան յուշանուէրներ յանձնեցին կայծակնային եւ արագ ճատրակի Լիբանանի ախոյեան ՀԵԸ Անդրանիկ Անթիլիասի մարզիկներուն:
Երեկոյի աւարտին տեղի ունեցաւ հիւրասիրութիւն:
ՀԵԸ –Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
