Հայաստանի եւ Ռուսիոյ նախագահներ Սերժ Սարգսեանի եւ Վլատիմիր Փութինի հանդիպումէն առաջ եւ ետք հնչած յայտարարութիւնները կը վկայեն, որ հայ-ռուսական յարաբերութիւնները կը գտնուին բաւական բարձր մակարդակի վրայ: Նման դիտարկում ըրած է քաղաքագէտ Հրանդ Մելիք-Շահնազարեանը:
«Խօսքը կը վերաբերի տնտեսական, ռազմական համագործակցութեան եւ ընդհանրապէս տարածաշրջանին մէջ քաղաքականութիւն ձեւաւորելու հիմնախնդիրներուն: Կը կարծեմ երէկուան հանդիպումը այդ յարաբերութիւններու, մտերմութեան լաւագոյն ապացոյցներէն է»,- նշած է ան, եւ ընդգծած, որ երկու երկիրներու ղեկավարներուն յայտարարութիւնները լաւատեսական տրամադրութիւններու առիթ կու տան:
Նախագահներու` ԼՂ հակամարտութեան կարգաւորման շուրջ անդրադարձին վերաբերեալ քաղաքագէտը համոզում յայտնած է, որ այդ հարցը չէր կրնար շրջանցուիլ ՌԴ եւ ՀՀ նախագահներու հանդիպման օրակարգէն: Անոր խօսքով` Հարաւային Կովկասի մէջ ասիկա հիմնական խնդիրն է:
«Այս հարցը կը վերաբերի ո՛չ միայն Հայաստանին, Արցախին եւ Ազրպէյճանին, այլ ընդհանրապէս` տարածաշրջանային անվտանգութեան: Որոշ չափով ասիկա կ’ազդէ նաեւ յարակից տարածաշրջաններուն մէջ ընթացող գործընթացներուն վրայ: Հարաւային Կովկասի մէջ կայունութիւնը թոյլ կու տայ Ռուսիոյ աւելի վստահ զգալու Մերձաւոր Արեւելքի մէջ իր գործողութիւններուն գծով եւ աւելի ապահով թիկունքով հանդէս գալու այնտեղ»,- ըսած է քաղաքագէտ Մելիք Շահնազարեանը:
Անոր կարծիքով` քննարկումները չեն վերաբերած լուծումներուն, այլ այս պահուն հանգիստ իրավիճակ եւ կայունութեան կանխատեսելիութիւն ապահովելու խնդիր կայ:
«Ամենայն հաւանականութեամբ, այս ուղղութեամբ ալ ընթացած են քննարկումները, որպէսզի սահմանի վրայ իրավիճակը հանգիստ ըլլայ եւ այս պայթիւնավտանգ դրութիւնը որեւէ կերպով յաղթահարուի»,- նկատած է քաղաքագէտը:
ՀՀ նախագահ Սերժ Սարգսեան Ռուսիոյ Դաշնութիւն աշխատանքային այցին ծիրէն ներս, Օգոստոսի 23-ին, Սոչիի մէջ հանդիպում ունեցած է ՌԴ նախագահ Վլատիմիր Փութինի հետ: Նախագահները, հանդիպման ընթացքին, անդրադարձած են շարք մը հարցերու, ինչպէս նաեւ` Լեռնային Ղարաբաղի հակամարտութեան կարգաւորման:
