Հայաստանի եւ Իրանի միջեւ ազատ տնտեսական գօտիի ստեղծման գործընթացին հետ կապուած՝ ՀՀ վարչապետ Կարէն Կարապետեան յայտարարած է, որ այս տարուան Նոյեմբերին արդէն իսկ պիտի ստեղծուի որոշ հարթակ մը: Այս մասին, վարչապետ Կարապետեան յայտարարած է Ծաղկաձորի մէջ լրագրողներու հետ ճեպազրոյցի մը ընթացքին:
«Այդ հարցով մենք բազմաթիւ փորձեր ըրած ենք` եղած են ե՛ւ յաջող բանակցութիւններ, ե՛ւ անյաջող բանակցութիւններ, սակայն այդ հարթակը անպայման պիտի ստեղծենք: Շուտով Իրան կայանալիք այցին ժամանակ՝ պիտի խօսինք այդ մասին: Նաեւ վերջերս Տնտեսական զարգացման եւ ներդրումներու նախարարը հանդիպած էր Իրանի Իսլամական Հանրապետութեան նախագահի խորհրդականին հետ եւ այս հարցերը քննարկուած էին»,- նշած է ՀՀ կառավարութեան ղեկավարը:
Կարէն Կարապետեան անդրադարձած է նաեւ Իրանի կողմէ հայկական արտադրութեամբ ուժանիւթի ուղիղ գնման հնարաւորութեան: «Այս պահուն որեւէ բանակցութիւն չենք վարած, եթէ ըլլայ նման առաջարկ, որ գնային համեմատականով մեզի համար ձեռնտու ըլլայ` մեծ սիրով»,- ընդգծած է ՀՀ վարչապետը:
