Տիարպեքիրի Սուր շրջանին մէջ գտնուող քրիստոնէական տարբեր ուղղութիւններու պատկանող եկեղեցիները փակ են այցելութիւններու եւ ծիսակատարութիւններու համար: Այս մասին կը յայտնէ պոլսահայ «Ակօս» շաբաթաթերթը` յիշեցնելով, որ 2015 թուականին քիւրտերու եւ պետութեան միջեւ սկսած բախումներուն հետեւանքով մեծ վնաս կրած էին նաեւ կրօնական նշանակութիւն ունեցող շէնքերը:
Բախումներու եւ աւերածութիւններէ ետք, 2016 Մարտ 25-ին, կառավարութիւնը Սուրի մեծ մասը պետութեան օգտին օտարելու որոշում կայացուցած էր: Օտարման ներկայացուած եղած է նաեւ Տիարպեքիրի հայկական Սուրբ Կիրակոս եկեղեցին, որուն հիմնադրամը կառավարութեան որոշումը բողոքարկող հայց ներկայացուցած էր Վերաքննիչ դատարան: Դատարանը կայացուցած էր կառավարութեան որոշումը դադրեցնելու վճիռ, սակայն դատական գործընթացը դեռ կը շարունակուի:
Կը նշուի, որ Սուրբ Կիրակոսը արդէն 3 տարի է փակ է եւ այնտեղ արարողութիւններ չեն կատարուիր, իսկ տեղի հայ բնակչութիւնը կրօնական ծէսերու համար այլ եկեղեցի չունի:
Տարածքը, ուր կը գտնուի եկեղեցին, գրեթէ ամբողջութեամբ փակ է: Եկեղեցւոյ հիմնադրամի ղեկավարները քանի մը ամիս առաջ յատուկ արտօնութեամբ միայն կրցած էին եկեղեցի այցելել: Սուրբ Կիրակոսի հիմնական շէնքի պատերէն բացի՝ մնացած շինութիւնները վնասուած են, ապակիները` կոտրուած:
Հիմնադրամի ղեկավարութիւնը, բացի ներկայացուցած բողոքարկումէն, կապ կը պահպանէ պետական կառոյցներու հետ: Անոնց խոստացած են, որ պետութիւնը պիտի փոխհատուցէ վնասը: Բացի Սուրբ Կիրակոսէն, իշխանութիւնները խոստացած են վերականգնել հայկական կաթողիկէ Սուրբ Սարգիս եկեղեցին, որ ամենաշատ վնաս կրած էր:
