ՀՀ Նախագահ Սերժ Սարգսեան, Օգոստոս 18-ին, ցաւակցական հեռագիր մը յղած է Սպանիոյ Թագաւոր Ֆելիփէ Վեցերորդին՝ Պարսելոնայի մէջ տեղի ունեցած ահաբեկչական յարձակման առիթով, որ պատճառ դարձած է տասնեակ անմեղ զոհերու եւ վիրաւորներու: Ըստ ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութեան տեղեկութիւններուն՝ Հանրապետութեան Նախագահի ցաւակցական հեռագիրին մէջ ըսուած է.
«Վիշտի ու կորուստի այս ծանր պահուն իմ անկեղծ ցաւակցութիւնն ու զօրակցութիւնը կը յայտնեմ Ձեզի, Սպանիոյ բարեկամ ժողովուրդին ու զոհուածներու հարազատներուն` մաղթելով ուժ ու ոգիի արիութիւն, իսկ վիրաւորներուն` շուտափոյթ ապաքինում:
Նման անմարդկային գործողութիւնները վերստին կու գան հաստատելու մեր այն համոզումը, որ անհրաժեշտ է միասնականօրէն եւ վճռականութեամբ շարունակել միջազգային հանրութեան պայքարը ահաբեկչութեան չարիքի եւ բռնութեան բոլոր դրսեւորումներուն դէմ»:
