Երեւանի քաղաքապետարանի «Երեւանեան Ամառ 2017» եռամսեայ միջոցառումներու ծրագրով հերթական միջոցառումը գարեջրասէրներու համար էր: Կարապի լիճի յարակից տարածքին կազմակերպուած է արդէն աւանդական դարձած, մայրաքաղաքի բնակիչներու եւ հիւրերու կողմէն սիրուած Երեւանի գարեջուրի 4-րդ փառատօնը:
Ինչպէս «Արմէնփրէս»-ին տեղեկացուցած են Երեւանի քաղաքապետարանի տեղեկատուութեան եւ հասարակայնութեան հետ կապերու վարչութենէն, միջոցառման ընթացքին հայկական գարեջրային շուկայի առաջատար ընկերութիւնները, մայրաքաղաքի գարեջրատուները, սրճարաններն ու pub-երը մասնակիցներուն ներկայացուցած են հայկական գարեջրագործութեան լաւագոյն աւանդոյթները, ինչպէս նաեւ գարեջուրի ստեղծման շուրջ երեքհազարամեայ պատմութիւնը:
