Ռուսիոյ Դաշնութեան մէջ Հայաստանի Հանրապետութեան արտակարգ եւ լիազօր դեսպան Վարդան Տողանեան, Տնտեսական զարգացման եւ ներդրումներու նախարարի խորհրդական Գագիկ Մկրտչեան եւ ՌԴ-ի մէջ ՀՀ առեւտրական ներկայացուցիչ Կարէն Ասոյեան Մոսկուայի մէջ հանդիպած են ՌԴ ելեւմտական նախարարի տեղակալ Ալեքսէյ Մոիսէեւի հետ` քննարկելու ոսկերչութեան եւ ադամանդագործութեան ոլորտին մէջ Հայաստանի եւ Ռուսիոյ միջեւ համագործակցութեան ընդլայնման հնարաւորութիւնները:
ՀՀ տնտեսական զարգացման եւ ներդրումներու նախարարութեան տեղեկութիւններով՝ հանդիպման ընթացքին կողմերը քննարկած են ադամանդի հումքի մատակարարումներու արդիւնաւէտութեան բարձրացման խնդիրը` ինչպէ՛ս «Ալռոսա»-էն, այնպէ՛ս ալ «գոխրան»-էն: Հայկական պատուիրակութեան անդամները ՌԴ ելեւմտական փոխնախարարի ղեկավարած խումբին հետ զրոյցին ընթացքին անդրադարձած են նաեւ պետական յարգադրոշման եւ յարգորոշման փոխադարձ ճանաչման հարցերուն:
Կողմերը քննարկած են խնդիրներու լուծման նորարական մօտեցումներուն եւ նոր կառուցակազմերուն կիրառումը: Անոնք համաձայնած են հնարաւորինս սեղմ ժամկէտներու մէջ անցնիլ գործնական քայլերու:
Տնտեսական զարգացման եւ ներդրումներու նախարարի խորհրդական Գագիկ Մկրտչեանի խօսքով` այդ համաձայնութիւններուն իրականացումը պիտի ապահովէ ոլորտի աճին շարունակականութիւնը:
