Մոսկուայի մերձակայ շրջաններէն մէկուն մէջ հանդիսաւորութեամբ սկսած են երրորդ «Միջազգային բանակային խաղերը», որոնց կը մասնակցին 28 երկրի 4000 զինուորական: Այս մասին կը հաղորդէ ՀՀ պաշտպանութեան նախարարութեան տեղեկատւութեան եւ հասարակայնութեան հետ կապերու վարչութիւնը։
«Միջազգային բանակային խաղեր 2017»-ն տեղի կ՛ունենայ 5 երկիրներու` Ռուսիոյ, Ազրպէյճանի, Ղազախստանի, Պելոռուսիոյ եւ Չինաստանի 21 ռազմափորձարաններու մէջ:
Բացման արարողութեան ներկայ եղած է նաեւ Հայաստանի Հանրապետութեան պաշտպանութեան նախարար Վիգէն Սարգսեան: Հայկական բանակի խումբը այս զինուորական մրցումներուն ներկայացուած է 75 հոգինոց խումբով: Հայ զինուորները պիտի մրցին «Թանկային պիաթլոն» մարզաձեւին, զուգահեռաբար իրենց հմտութիւնները պիտի ներկայացնեն սակրաւորները, հետախոյզներն ու արձակազէնները: Առաջին անգամ ըլլալով խաղերուն կը մասնակցին Իսրայէլը, Սուրիան, Ուզպեքիստանը եւ Մարոքը: Միջազգային բանակային խաղերը կը տեւեն մինչեւ Օգոստոս 12, իսկ Օգոստոս 5-ին «Ալապինօ» ռազմափորձարանին մէջ պիտի յայտարարուի նաեւ Հայաստանի օր, որուն ընթացքին պիտի հնչեն հայկական երգն ու պարը, պիտի ներկայացուի հայկական մշակոյթը:
