Ծանօթ է, որ Թուրքիոյ եւ Գերմանիոյ միջեւ յարաբերութիւնները օրէ օր աւելի կը լարուին: Կան բազմաթիւ հարցեր, որոնք այս շրջանին դէմ դիմաց կը բերեն Թուրքիան եւ Գերմանիան, եւ որոնց անդրադառնալու առիթը ունեցանք բազմիցս: Գերմանացի քաղաքագէտներ, սկսած այդ երկրի վարչապետէն, այլեւս բառեր չեն խնայեր Թուրքիան դատապարտելու, բայց անմիջապէս փոխադարձը կը գտնեն թուրք քաղաքագէտներու բերանէն:
Ըստ Փարիզի «Նոր Յառաջ» թերթին՝ երկու երկիրներուն միջեւ յարաբերութիւնները խանգարող ազդակներէն մէկն ալ Հայոց Ցեղասպանութեան հարցն է: Այս կէտը պարբերաբար օրակարգի կը բերուի թուրք քաղաքագէտներու կամ հրապարակագիրներու կողմէ:
Յուլիս 23-ին, «Սէօզճիւ» թերթի աւագ խմբագիր Ռահմի Թուրան, իր «Ո՞վ է, որ կը հանդուրժէ» խորագրեալ յօդուածին մէջ, կրկին կը յիշեցնէ այս կէտը: Հակադարձելով գերմանացի նախարարի մը այն հաստատումին, թէ Գերմանիա մինչեւ հիմա շատ հանդուրժեց Թուրքիոյ, սակայն այլեւս այդպէս կարելի չէ շարունակել, Ռահմի Թուրան հարց կու տայ, թէ մինչեւ հիմա ո՛վ՝ որո՛ւն հանդուրժեց, Գերմանիա՞ն, թէ Թուրքիան եւ թուրք ժողովուրդը։
«Քաղաքական հարցերը օր մը կը լուծուին, բայց գերմանացիները թուրք ժողովուրդը նախատեցին, պնդելով որ ան Հայոց Ցեղասպանութիւն գործած է, եւ ուստի Հայոց Ցեղասպանութեան մասին օրէնք քուէարկեցին: Գերմանացիները այդ քայլով մեծ ամօթ գործեցին՝ թուրք ժողովուրդը ցեղասպան հռչակելով», կը գրէ Թուրան, կոչ ընելով քաղաքագէտներուն, որ աւելի՛ խոհեմ ձեւով շարժին:
