Երեքշաբթի, 18. 02. 2025

spot_img

ՀԲԸՄ Անդրանիկ Բանակում- Տասնամեակի Յոբելենական Խարուկահանդէս

Սկաուտական   օրացոյցի   ամենաուրախ  պահերը անկասկած   տարեկան բանակումի եւ խարուկահանդէսի  յիշատակներն են:  Այդ խանդավառութիւնը այսօր  ստացած է  կրկնակի խորք, որովհետեւ  մեր պատանիները  բախտաւորութիւնը ունին  հայրենի հողին վրայ լարելու իրենց բանակումի վրանները եւ հայրենի բնութեան  գիրկը կազմակերպելու խարուկահանդէսները:

  ՀԲԸՄ-ՀԵԸ-ի  մեծ  ընտանիքին համար արդէն աւանդութիւն  դարձած է  իւրաքանչիւր   Ամառ, աշխարհի տարբեր ափերէն սկաուտական շարժումներու մասնակցութեամբ, հայրենիքի  սեփական  բանակավայրին մէջ կազմակերպել  տարեկան  բանակում եւ խարուկահանդէս:  Այս  տարուան  բանակումը   տասնամեակի  յոբելենական  ըլլալով, յաւելեալ խանդավառութիւն  մը  կը  տիրէր  զայն կազմակերպող մարմիներուն  եւ մասնակիցներուն մէջ:

   Կիրակի  9 Յուլիսին, ՀԵԸ   Անդրանիկ Սեւան եւ Անդրանիկ Անթիլիաս  սկաուտական խումբերու արենոյշներ եւ սկաուտներ (12-էն 18  տարեկան),  չորս  պատասխանատուներու ընկերակցութեամբ, ընդհանուր թիւը՝ 32, վաղ առաւօտեան   ժամը՝ 4-ին  մէկտեղուեցան ՀԲԸՄ-ի Տեմիրճեան կեդրոնը, ուր  յիշատակի նկար մը վերցնելէ ետք, հրաժեշտ տալով իրենց  ծնողներուն, միութենական  բարեկամներուն,  յատուկ  օթոպիւսով  ուղղուեցան դէպի  Պէյրութի  միջազգային  օդակայանը:  Օդանաւը  կարճ ուշացումէ  ետք   թռիչք առաւ դէպի   հայրենիք  եւ Երեւանի ժամով՝ 11.20-ին  վայրէջք կատարեց  Զուարթնոց միջազգային օդակայանը: 

 Օդակայանին մէջ  լիբանանեան սկաուտական պատուիրակութիւնը  դիմաւորեցին  Հայաստանի խմբապետական կազմէն,  ՀԲԸՄ Երեւանի սկաուտական խումբէն  երկու  միութենականներ: Մեր  պատուիրակութիւնը  ճամբայ ելաւ  դէպի ՀԲԸՄ Անդրանիկ  բանակավայրը՝ Դիլիջանէն դէպի  Վանաձորի ճանապարհին վրայ,   Լոռիի մարզի  Թէժ  Լեռ կոչուած  շրջանին մէջ:  Օթոպիւսներուն մէջ, մեր  սկաուտները, արենոյշները  կ’երգէին  ազգային, հայրենասիրական  երգեր: Պատուհաններէն դուրս կը  ճօճէին  Հայաստանի, Լիբանանի, ՀԲԸՄ-ՀԵԸ-ի դրօշները:

 

Բանակավայրին մէջ  մեր սկաուտներուն եւ արենոյշներուն   դիմաւորեցին  տարբեր երկիրներէ  նախապէս   ժամանած ՀԲԸՄ-ՀԵԸ-ի սկաուտական  խումբեր: Այնտեղ էին  ՀԲԸՄ- ՀԵԸ-ի Երեւանի  սկաուտական  միաւորէն  արծուիկներ եւ  գայլիկներ ( թիւով  75),Իրաքի խումբը (թիւով 14):Յաջորդ՝  Կիրակի  օր, բանակավայր ժամանեցին  Վրաստանէն՝  Թիֆլիսի եւ Ջաւախքի  ՀԲԸՄ- ՀԵԸ-ի սկաուտական խումբերը (թիւով՝ 24):

Բանակավայրին  ընդհանուր պատասխանատուն էր  եղբայր Ռէյմոնտ Յարութիւնեան: Իրանէն  ժամանած էին  չորս միութենականներ, օժանդակելու եղբայր Ռէյմոնտին:

Մեր  արենոյշները եւ սկաուտները  տեղաւորեցին իրենց առարկաները եւ անմիջապէս լծուեցան  ձեռային  տարբեր աշխատանքներու՝ պատրաստելու բանակավայրը:   Իւրաքանչիւր սկաուտական խմբակ ստանձնած  էր բաժին մը:  Մեր սկաուտները  պատրաստեցին   բանակումին  մուտքը եւ  աշտարակը:

 Առաջին երեք  օրերը  տրամադրուեցան  բանակավայրի   պատրաստութեան:

 Բանակումին պաշտօնական  բացումը  տեղի ունեցաւ 12  Յուլիսին: Բացման արարողութեան ներկայ   գտնուեցան  Գուգարքի թեմի Առաջնորդ  Սեպուհ սրբազանը  , ՀԲԸՄ-ի  Երեւանի ընդհանուր խմբապետ  եղբայր Սարօ Թադէոսը, Ռէյմոնտ Յարութիւնեանը, մամուլի ներկայացուցիչեր, որոնք   յետագային արձագանգեցին սկաուտական այս մեծ  եղելութեան:

   ՀԲԸՄ Երեւանի սկաուտական փողերախումբին  առաջնորդութեամբ, բոլոր պատուիրակութիւնները   իրենց  սկաուտական տարազներով  մուտք գործեցին բանակավայր: Անոնք  համախմբուեցան  սկաուտական կայմին շուրջ: Այս առիթով խօսք առին  խումբերու ընդհանուր պատասխանատուները:

 Յատկանշական էր, որ ՀԲԸՄ Անդրանիկ  բանակավայրը  արդէն տասերորդ  տարին  ըլլալով    կը համախմբէր  հայրենի եւ Սփիւռքի   ՀԲԸՄ-ՀԵԸ- ական  սկաուտական  խմբաւորումները:  Այս տարուան  բանակումը յոբելենական տարի ըլլալով, սրբազանը  օծեց  բանակումի դրօշակը: Փաստօրէն  բանակումը ունեցաւ իր սեփական դրօշակը:Կայմին վրայ կը ծածանէին Հայաստանի, ՀԲԸՄ-ՀԵԸ-ի դրօշները: Բացման  հանդիսութեան  յաջորդեց  հիւրասիրութիւն: Երեկոն անցաւ  ընկերային  զուարճալի  մթնոլորտի  մէջ:

  Յաջորդ օրը,  Երկուշաբթի առաւօտեան, ՀԲԸՄ-ՀԵԸ-ի  Լիբանանի սկաուտական   խումբը  այցելեց Վանաձորի  բուսաբանական այգին եւ  ծանօթացաւ Հայաստանի  բուսական աշխարհի  նմոյշներուն:  Անոնք  շրջեցան Վանաձորի  մէջ եւ    երեկոյեան  վերադարձան բանակավայր:  

Յաջորդ  օրը այցելեցին Գոշավանք, ծանօթացան պատմական  վանքին: Այդ   երեկոյեան,մեր տղաքը եւ աղջիկները կազմակերպեցին  լիբանանեան ճաշի երեկոյ մը: Ներկաները  գոհ մնացին լիբանանեան խոհանոցի  բարիքներէն:   

Երկօրեայ  պտոյտներէն  ետք, սկսան  խարուկահանդէսի  պատրաստութիւնները:  Դարձեալ հաւաքական աշխատանք: Իւրաքանչիւր  երկիրէ ժամանած սկաուտական խմբակ  ստանձնած էր բաժին մը:  ՀԲԸՄ-ՀԵԸ Լիբանան երգով  եւ պարով  պիտի մասնակցէր  խարուկահանդէսին:   

Կիրակի,  16  Յուլիսի  կէսօրին,  ՀԲԸՄ Անդրանիկ  բանակավայրին  մէջ  բանակումներուն տասնամեակին առիթով  տեղի ունեցաւ աւանդական հարիսայի  պատրաստութիւն:  Ճաշէն  ետք,  սկսաւ  խարուկահանդէսի արարողութիւնը:   Ներկաներուն  թիւը   մասնակից   սկաուտական խումբերով,  ծնողներով եւ  այցելուներով կը հաշուէր  650: 

Սկաուտական բոլոր խմբաւորումները   ՀԲԸՄ- Երեւանի փողերախումբին  առաջնորդութեամբ մուտք  գործեցին   բանակավայր եւ համախմբուեցան կայմին  շուրջ, ուր տեղի ունեցաւ դրօշակի արարողութիւն: Իւրաքանչիր   խումբի կողմէ նախապէս  ընտրուած  տիպար անդամը բարձրացուց իր   երկրին  դրօշը:    ՀԲԸՄ-ՀԵԸ Լիբանանի   «տիպար  անդամ»ը  ընտրուեցաւ քոյր արենոյշ Գարին Տիշչեքենեանը:  Ան բարձրացուց  Լիբանանի   դրօշակը:  Տարբեր երկիրներու դրօշներուն կողքին կը ծածանէին ՀԲԸՄ-ի եւ ՀԵԸ-ի դրօշները:

 Խարուկահանդէսի  առիթով  յաջորդաբար խօսք առին Ռէյմոնտ   Յարութիւնեանը, ՀԵԸ-ի Կեդրոնական  գրասենեակի վարիչ տնօրէն, բանակավայրի  հիմնդարութեան գլխաւոր սիւներէն,ութ յաջորդական տարիներ  ՀԲԸՄ Անդրանիկ  բանակումի  ընդհանուր  կազմակերպիչ եւ պատասխանտու  Գէորգ Սանթուրեանը, ՀԲԸՄ-ի Երեւանի գրասենեակի փոխտնօրէն  Յովիկ Էօրտեքեանը,  ՀԲԸՄ  Երեւանի սկաուտական շարժումի պատասխանատու Սարօ  Թադէոսը: Անոնք   կատարեցին  բանակավայրի    հիմնադրութեան պատմականը եւ շեշտեցին միութենական աւանդութիւնները  պահպանելու անհրաժեշտութիւնը: Ապա  բոլոր կազմերը ուղղուեցան դէպի  խարուկահանդէսի  վայրը, ուր Ռէյմոնտ Յարութիւնեան,  Գէորգ Սանթուրեան, Յովիկ էօրտեքեան, Սարօ Թադէոս, Կարէն   Տիրարեան վարեցին խարուկահանդէսին կրակը:

Խարուկահանդէսի  միջոցին խօսք առին  Գէորգ Սանթուրեանը, Սարօ Թադէոսը եւ Ռէյմոնտ  Յարութիւնեանը:  Այս առիթով ՀԲԸՄ բանակումի եւ ՀԲԸՄ-ի սկաուտական խումբերու  յանձնուեցան  երախտագիտական յուշանուէրներ: Գործադրուեցաւ  գեղարուեստական  յայտագիր, մէկ խօսքով   միութենական   ուրախ  եւ ջերմ  մթնոլորտ:   

 Սկաուտական կազմերը  Երկուշաբթի ամբողջ  օրը   բանակումին մէջ մնացին բանակավայրին մէջ, հանգստանալու:

Երեքշաբթի  18  Յուլիսի առաւօտեան,    սկաուտական  խումբերը այցելեցին  Ծիծեռնակաբերդ, Հայոց Ցեղաասպանութեան յուշակոթողին անմար կրակին առջեւ  վերանորոգեցին իրենց պահանջատիրական  ուխտը, ապա  այցելեցին ՀԲԸՄ-ի ամերկեան  համալսարանը,  իսկ կէսօրէ  ետք՝  Մայր Աթոռ  Սուրբ Էջմիածին:

Չորեքշաբթի,  19 Յուլիսին այցելեցին Եռաբլուր, ապա՝  Հայորդաց  Տուն, ուր ծանօթացան    Հայորդաց  Տան սաներուն աշխատանքներուն: Հայորդաց  Տան  սաները   գեղարուեստական  յայտագիր մը  ներկայացուցին ի պատիւ  հիւրերուն:

 Պտոյտներու   գեղեցիկ  յայտագիր:  Մեր  տղաքը եւ աղջիկները  այցելեցին Սեւանայ  լիճ, պատմական եկեղեցիները, Դիլիջան՝  Պարզ Լիճ եւ այլ  գեղատեսիլ  վայրեր:

   Շաբաթ,  22 Յուլիսին մեր սկաուտները եւ արենոյշները  սկսան  քակել   բանակավայրին մէջ  իրենց պատրաստած  սարքերը: Մեկնումէն առաջ, բանակումի   մասնակիցները փոխանակեցին յիշատակի յուշանուէրներ: Անոնք  հրաժեշտ տուին  բանակավայրին եւ   վերադարձան Երեւան՝ ՀԲԸՄ-ի Վահէ Կարապետեան կեդրոնը, ապա շրջեցան  մայրաքաղաքին մէջ:    

Կիրակի, 23  Յուլիսի կէսօրին,  ՀԲԸՄ-ՀԵԸ-ի  Լիբանանէն ժամանած սկաուտական   խումբը ճամբայ  ելաւ դէպի  Զուարթնոցի  օդակայանը: Անոնք  բարձր տրամադրութեամբ, փայլուն  յիշատակներով, միութենական աշխատանքի նոր  եռանդով  վերադարձան Պէյրութ:

ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Ara D. Kassabian CPA, based in Glendale, California, provides a full range of tax preparation, accounting and bookkeeping services, either in your facility or at our location. Making it quick and easy to file your taxes.

spot_img

Զօրակցիր Զարթօնք Օրաթերթին