Այս տարուան Յուլիս 26-ի դրութեամբ` Հայաստանէն արտահանուած է 65 հազար թոն պտուղ- բանջարեղէն: «Արմենփրես»-ի հաղորդմամբ` Յուլիս 26-ին լրագրողներու հետ հանդիպման ժամանակ ըսած է Հայաստանի գիւղատնտեսութեան նախարարի տեղակալ Ռոպերթ Մակարեան:
«Այս տարի արդէն 26 հազար թոն միայն ծիրան արտահանուած է, նախորդ տարի անիկա կազմած էր 19 հազար 900 թոն: Վերջին 7 տարիներու ընթացքին նման ցուցանիշ չէ արձանագրուած: Ծիրանի արտահանումը կը շարունակուի, քանի որ սառնարաններու մէջ դեռ մնացած է պահեստաւորուած ծիրան : Ելակի արտահանումը կազմած է 2500 թոն, որ երկու անգամ գերազանցած է նախորդ տարուան ծաւալը: Հանրապետութենէն արտահանուած է 5400 թոն գետնախնձոր, նախորդ տարուան համեմատ ատիկա երեք անգամ աւելի է: Արտահանման հիմնական երկիրներն են` Ռուսիան` 62 հազար թոն, Վրաստան, Արաբական Միացեալ Էմիրութիւններ, Պելառուսիա եւ Ուքրանիա»,- նշած է ան:
Անոր խօսքով` Հայաստանի վերամշակող ընկերութիւններուն կողմէ Յուլիս 26-ի դրութեամբ մթերուած է 10 հազար 500 թոն պտուղ-բանջարեղէն, որմէ 1330 թոն` բանջարեղէն, 9170 թոն` պտուղ:
«Միայն 7300 թոն ծիրան մթերոած է: Նախորդ տարուան նոյն ժամանակահատուածի համեմատ վերամշակող ընկերութիւններուն կողմէ մթերուած է 7100 թոն պտուղ-բանջարեղէն: Այս տարի շուրջ 67 տոկոսով աճած է»,- նշած է Մակարեան։
