Իրանի մէջ Հայաստանի դեսպանութեան եւ իրանեան «Art and experience» մշակութային կազմակերպութեան նախաձեռնութեամբ կ’ընթանայ հայկական ֆիլմերու շաբաթ։ «Ալիք» օրաթերթի թղթակից Կ. Դաւթեան կը յայտնէ, թէ Յուլիս 19-ին տեղի ունեցած մամլոյ ասուլիսի մը ընթացքին՝ այս մասին տեղեկացուցած է Իրանի մէջ Հայաստանի արտակարգ եւ լիազօր դեսպան Արտաշէս Թումանեան:
Դեսպան Թումանեան յայտնած է, որ Իրանի մէջ հայկական ֆիլմերու շաբթուան մեկնարկը սկսած է Յուլիս 23-ին, որ պիտի տեւէ մինչեւ Յուլիս 29:
Շաբթուան ընթացքին պիտի ցուցադրուի 10 ֆիլմ, որոնց ընտրութիւնը կատարուած է կազմակերպիչ կողմերուն միջոցաւ: Ֆիլմերը պիտի ցուցադրուին Թեհրանի, Մաշհատի եւ Շիրազի մէջ:
Ֆիլմերու ցուցադրութեանց զուգահեռ Իրան ժամանած հայաստանցի երկու ֆիլմարուեստի մասնագէտներ վարպետութեան դասեր պիտի տան:
