*ՆՈՐԱՅՐ ՅՈՎՍԷՓԵԱՆ*
Յուլիս 1-20 Շուշիի մէջ կայացած է «Յակոբ Գիւրջեան» քանդակի միջազգային 5-րդ սիմփոզիումը: Սերպիան, Հնդկաստանը, Եգիպտոսը եւ հայկական երկու հանրապետութիւնները ներկայացնող 10 քանդակագործները՝ 20 օր ապրած ու աշխատած են բերդաքաղաք Շուշիի մէջ, շունչ ու հոգի հաղորդելով արցախեան քարին: Հերթական հանդիպումը իրականութիւն դարձած է «Ապագայ սերունդներու հիմնադրամ»-ի նախագահ Գրիգորի Գաբրիէլեանցի անմիջական աջակցութեամբ: Ակադեմիկոսը կարեւոր կը համարէ աշխարհի տարբեր երկիրներէն երիտասարդ արուեստագէտները միաւորող մշակութային ձեռնարկին գաղափարը: Աջակցած են նաեւ գործարարներ: Արցախի մշակոյթի եւ երիտասարդութեան հարցերու նախարար Նարինէ Աղաբալեան շնորհակալութիւն յայտնած է բոլոր անոնց, որոնց ջանքերով ու սրտացաւ վերաբերմունքին շնորհիւ կայացաւ 5-րդ սիմփոզիումը:
Մայեան երկրորդ անգամ ըլլալով կը մասնակցի սիմփոզիումին: Կ’ըսէ, որ անիկա իրեն տուած է մեծ ուժ եւ ինքնավստահութիւն, ընդլայնած է ընկերներուն ցանկը: Իսկ ստեղծագործութիւնը անուանակոչուած է «Ոսկէ սկաւառակ»:
Գոռ Մատոյեանը առաջին անգամն է որ կը մասնակցի սիմփոզիումին: Չի թաքցներ իր հիացմունքն ու յաջորդ տարի սիրով մասնակցելու ցանկութիւնը: Գործերը նուիրելու փորձ ունի` անոր հեղինակած հարթաքանդակը տեղադրուած է Ստեփանակերտի եկեղեցւոյ բակը: Իսկ այս սիմփոզիումին ստեղծած քանդակը, որ «Պայքար» կոչած է, պիտի ձգէ Շուշիի մէջ:
Իսկ հնդիկ քանդակագործ Գանդա Գիշորէ Մոհարանան երկրորդ անգամ ըլլալով կը մասնակցի Շուշիի մէջ կազմակերպուող սիմփոզիումին: Անոր աշխատանքն ալ համաշխարհային թեմայով է՝ խմելու ջուրի սակաւութեան ու զայն պահպանելու անհրաժեշտութեան մասին: «Շուշիի մէջ առաջին անգամ եղած եմ 2014 թուականին: Իմ քանդակը կը խորհրդանշէ ջուրը, քանի որ ամբողջ աշխարհի մէջ առկայ է ջուրի խնդիրը եւ անիկա պահպանութեան կարիք ունի: Իւրաքանչիւր կաթիլը կը խորհրդանշէ մէկ կեանք: Կը կարծեմ ջուրի խնդիրը համաշխարհային հարց է, որուն պէտք է ուշադրութիւն դարձնել»,- կը մանրամասնէ Գանդա Գիշորէ Մոհարանան:
Սիմփոզիումի ընթացքին ստեղծուող քանդակները կը նուիրաբերուին Շուշի քաղաքին: Անոնք կը տեղադրուին նոյն տարածքին մէջ: Իբրեւ արդիւնք՝ ծնած է Շուշիի Քանդակներու պուրակը, որ տարուէ տարի կ’ընդլայնուի ու կը բարեկարգուի:
Ստեփանակերտ
