ԵԱՀԿ Մինսկի խումբի համանախագահները Յուլիս 11-ին Պրիւքսէլի մէջ Հայաստանի ու Ազրպէյճանի արտաքին գործոց նախարարներ Էդուարդ Նալպանտեանի ու Էլմար Մամետեարովի հետ հանդիպման իբրեւ արդիւնք յայտարարութիւն տարածած են:
«ԵԱՀԿ Մինսկի խումբի համանախագահները` Իկոր Փոփովը (Ռուսիա), Ստեֆան Վիսքոնթին (Ֆրանսա) եւ Ռիչըրտ Հոգլանտը (ԱՄՆ), Յուլիս 11-ին հանդիպած են Ազրպէյճանի արտաքին գործոց նախարար Էլմար Մամատեարովի եւ Հայաստանի արտաքին գործոց նախարար Էդուարդ Նալպանտեանի հետ` քննարկելու Լեռնային Ղարաբաղի հակամարտութեան կարգաւորման շուրջ յետագայ աշխատանքի մանրամասները: Հանդիպման ներկայ եղած է նաեւ ԵԱՀԿ գործող նախագահի անձնական ներկայացուցիչ Անճէյ Գասպշիկը:
Նախարարները համաձայնած են փոխանցել իրենց նախագահներուն համանախագահներու առաջարկը` այս տարի աւելի ուշ բարձր մակարդակով հանդիպում կազմակերպելու մասին: Համանախագահները առաջարկած են իրենց օգնութիւնը հանդիպման կազմակերպման գործին մէջ:
Քննարկուած է նաեւ ներկայ իրադրութիւնը սահմանագիծին վրայ:
Նախարարները եւ համանախագահները համաձայնած են կրկին հանդիպիլ Սեպտեմբերին Նիւ Եորքի մէջ` ՄԱԿ-ի Գլխաւոր ասամպլէայի 72-րդ նստաշրջանի ծիրէն ներս»,- նշուած է յայտարարութեան մէջ:
