Հովանաւորութեամբ ՀԲԸՄ-ի Լիբանանի կրթական յանձնախումբին, կազմակերպութեամբ Պօղոս Գ. Կարմիրեան վարժարանի տնօրէնութեան եւ ուսուցչական կազմին, Կիրակի 25 Յունիսին կէսօրէ առաջ ժամը 10:30-ին տեղի ունեցաւ միջնակարգի ամավերջի հանդէսը եւ վկայականաց բաշխումը, ներկայութեամբ ՀԲԸՄիութեան կրթական յանձնախումբի անդամներուն, ծնողներու եւ հիւրերու:
Լիբանանի, Հայաստանի, ՀԲԸՄ-ի եւ վարժարանիս քայլերգները յոտնկայս ունկնդրելէ ետք, հանդիսավարուհին՝ տիկին Վարդ Այվազ բեմ հրաւիրեց տիկին Մարալ Պալէօզեանը փոխանցելու տնօրէնութեան խօսքը:
Յարգելի տնօրէնուհին ողջունելէ ետք ներկաները ըսաւ. «Մեր վարժարանէն ներս հայ մանուկը կը թրծուի մարդկային վսեմագոյն յատկանիշներով, կը դրսեւորուին անոր բարոյական նկարագիրի ցայտուն կէտերը: Մեր մօտ անձը կը բիւրեղանայ միութենական ազնիւ ոգիով, նուիրումի գաղափարով»: Խօսքը շարունակելով տիկին Մարալը աւելցուց. «Յառաջիկայ վերամուտին վարժարանիս Ա. կարգի դասընթացքին մեծագոյն բաժինը պիտի ընթանայ արդիական i-pad գիտա-արհեստական գործիքի միջոցով եւ այս ձեւով փոքրիկը հոգեկան տարբեր համոզումով եւ բարի կամեցողութեամբ կը մօտենայ իրմէ պահանջուած դասանիւթերուն»: Անդրադառնալով անցնող տարեշրջանի գործունէութեան աւելցուց. «Մեր աշակերտները այս տարի եւս մասնակցեցան զանազան միջոցառումներու, անոնք փայլուն արդիւնքներ արձանագրեցին եւ լայն փորձառութիւն ձեռք ձգեցին»:
Եզրակացնելով իր խօսքը տիկին Պալէօզեան ըսաւ. «ՀԲԸՄիութեան վարժարանները իրենց հիմնադրման օրէն ցայսօր եղած են յաջողակ, բեղուն գործունէութեամբ տոգորուած, միշտ իրականացնելով ուսումնական համակարգի նորարարութիւնները: Այս առումով անոնք առաջինը կը դասուին, լիբանանահայ վարժարաններուն մէջ»:
Տնօրէնութեան խօսքէն ետք շրջանաւարտներէն՝ Գարլա Փելթէքեան, Լոռի Փոլաճեան եւ Տեսիլ Մսըրլեան պարեցին Սայեաթ Նովայի «Նազանի»ն, ապա Լոռի Փոլաճեան դաշնակի վրայ նուագեց «Mariage D’amour»:
Սքանչելի մենապար մը ներկայացուց Տեսիլ Մսըրլեանը, որմէ ետք ցուցադրուեցաւ շրջանաւարտներուն մանկապարտէզէն աւարտական դասարան, դպրոցական տարիներու զանազան առիթներու նկարներով տեսերիզ մը, պատրաստուած Մելքոն Մազաքեանի կողմէ:
Հայերէն լեզուի դասատու՝ տիկին Մարալ Քէհեայեանի նախաձեռնութեամբ աւարտական դասարանի աշակերտները հանդէս եկան թատերական ներկայացումով մը «Դէպի կանաչ ճանապարհ» խորագիրով, ուր իւրաքանչիւր աշակերտ յայտնեց իր ապագայ ծրագիրները եւ երազանքները , ապա անոնք երախտագիտական եւ շնորհակալութեան խօսքեր ուղղեցին տնօրէնութեան եւ ուսուցչական կազմին: Թատերգութեան ընթացքին նուագեցին՝ Տեսիլ Մսըրլեան (քլարինէթ) եւ Լոռի Փոլաճեան (երգեհոն), իսկ Ճիանի Աստուրեան (կիթառ):
Թատերգութենէն ետք հանդիսաւոր մուտք գործեցին շրջանաւարտները, ներկաներուն յոտնկայս ծափողջոյններուն տարափին տակ, իրենց դաստիարակին առաջնորդութեամբ:
Միջնակարգի շրջանաւարտներու անունով ուղերձ կարդաց Լոռի Փոլաճեան, ան իր խօսքին մէջ ըսաւ. «Այս մեծ մոլորակին մէջ շատ գեղեցիկ, փոքրիկ մոլորակ մըն է դպրոցը: Այս փոքրիկ մոլորակին մէկ կարեւոր հանգրուանը աւարտեցինք: Այժմ մեր յոյզերն ու զգացումները միախառնուած են՝ երջանիկ ենք, որ այս հանգրուանը աւարտեցինք, սակայն միեւնոյն ժամանակ տխուր ենք, որովհետեւ պիտի բաժնուինք մեր սիրելի վարժարանէն: Ապա շարունակելով խօսքը ըսաւ. «Շնորհիւ մեր ուսուցիչներուն, տնօրէնութեան եւ անձնակազմին, մենք յաղթահարեցինք մեր դիմագրաւած դժուարութիւնները: Այսօր մենք կրթութեամբ արմատաւորուած եւ անոր հասուն արգասիքով բեղմնաւորուած կ’ուղղուինք դէպի յառաջիկայ հանգրուան: Դասընկերներս եւ ես երբեք պիտի չմոռնանք այստեղ անցուցած մեր յիշատակելի օրերը եւ կրթութեան զէնքով տոգորուած, ինքնավստահ քայլերով պիտի շարունակենք մեր ուղին դէպի երկրորդական վարժարան, ուր դարձեալ նորանոր նուաճումներ ձեռք պիտի բերենք եւ բարձր պիտի պահենք ո՛չ միայն մեր ծնողներուն, տնօրէնութեան , ուսուցիչներուն անունը , այլ նաեւ մեր ազգին ու ՀԲԸՄ-ի մեծ ընտանիքին պատիւը»:
Ուղերձէն ետք հանդիսավարուհին բեմ հրաւիրեց Կրթական Յանձնախումբի ատենապետուհի՝ տիկին Լենա Իւրնէշլեանը փոխանցելու հուսկ բանքը մեր շրջանաւարտներուն:
Ապա բեմահարթակ ներկայացան տիկին Լենա Իւրնէշլեանը, ՀԲԸՄ վարժարաններու ընդհանուր տնօրէն պարոն Արա Վասիլեանը, վարժարանիս տնօրէնուհի՝ տիկին Մարալ Պալէօզեանը եւ Թ. կարգի դաստիարակ՝ տիկին Վարդ Այվազը մասնակցելու վկայականներու յանձնումին:
Հանդիսութեան աւարտին տեղի ունեցաւ մրցանակաբաշխութիւն եւ մրցանակներ ստացան գերազանց, բարձր պատուոյ եւ պատուոյ յիշատակութեան արժանի աշակերտները, ինչպէս նաեւ հայերէն լեզուի եւ հայոց պատմութեան բարձրագոյն միջին ունեցող աշակերտները:
Յատուկ մրցանակներ ստացան նաեւ «Հայ զինուորին» եւ «Հայոց լեզուին» նուիրուած շարադրական աշխատանքներուն յատուկ գնահատանքի արժանացող աշակերտներ, ուղարկուած Սփիւռքի նախարարութեան կողմէ:
2016-2017 ՏԱՐԵՇՐՋԱՆԻ
ՇՐՋԱՆԱՒԱՐՏՆԵՐՈՒ ԱՆՈՒԱՆԱՑԱՆԿ
- Աստուրեան Ճիանի
- Կիւլիւզեան Սերժ
- Մազաքեան Մելքոն
- Մսըրլեան Տեսիլ
- Փելթէքեան Գարլա
- Փոլաճեան Լոռի
