Քարէն Եփփէ Ազգ. Ճեմարանը 6 տարի ամայացած մնալէ ետք միացաւ իր զաւակներուն եւ իր յարկին ներքեւ համախմբեց միջնակարգի շրջանաւարտ հունձքը:
Շաբաթ, 17 Յունիս 2017-ի երեկոյեան, Ճեմարանի շրջափակին մէջ տեղի ունեցաւ միջնակարգի աւարտական հանդէսը, կը հաղորդէ «Գանձասար»-ը։
Յայտագիրին ընդմէջէն շրջանաւարտները անդրադարձան վարժարանի 70-ամեակին, ճեմարան վերադարձի բարեբաստիկ առիթին, Արամ Ա. Կաթողիկոսին կողմէ 2017 տարին «Վերանորոգումի Տարի» հռչակուելու խորհուրդին, դպրոցական իրենց առօրեային եւ Ճեմարանի առաքելութեան:
Ճեմարանի տնօրէն Յակոբ Քիլէճեան ներկայացուց 2016-2017 տարուան ուսումնական տեղեկագիրը, իսկ պետական տնօրէնուհին լուսարձակի տակ առաւ Ճեմարանի ուսումնակրթական անխափան երթը:
Այնուհետեւ ճեմարանի Շրջանաւարտից Միութեան կողմէ պարգեւատրուեցան միջնակարգի երեք կարգերու առաջնակարգ աշակերտները, ապա շրջանաւարտ հունձքը Առաջնորդ Սրբազան Հօր ձեռամբ միջնակարգի վկայական ստացաւ, իսկ հայերէն լեզուի առաջնակարգ ուսանողները տնօրէնութեան կողմէ գովասանագիրներով պարգեւատրուեցան:
