Չեխիոյ Հանրապետութեան Պատգամաւորներու պալատին մէջ կը քննարկուի Հայոց Ցեղասպանութիւնը դատապարտող բանաձեւ ընդունելու հաւանականութիւնը:
Ըստ «Armenpress.am»-ի, այս մասին ըսած է Չեխիոյ Հանրապետութեան եւ Սլովաքիոյ մէջ Հայաստանի Հանրապետութեան արտակարգ եւ լիազօր դեսպան Տիգրան Սէյրանեան:
«Հայոց Ցեղասպանութիւնը ճանչցած եւ դատապարտած են Չեխիոյ նախագահ Միլոշ Զեմանը, խորհրդարանի Պատգամաւորներու պալատի արտաքին յարաբերութիւններու յանձնաժողովը, պաշտօնեաներ եւ խորհրդարանականներ, Չեխիոյ կաթողիկէ եկեղեցին, այլ կառոյցներ եւ հեղինակաւոր գործիչներ: Պատգամաւորներու պալատին մէջ եւս կը քննարկուի այդ առնչութեամբ բանաձեւ ընդունելու հաւանականութիւնը»,- նշած է դեսպանը:
Չեխիոյ Հանրապետութեան Խորհրդարանի Պատգամաւորներու պալատի արտաքին յարաբերութիւններու կոմիտէն 14 Ապրիլ, 2017-ին միաձայն ընդունած է Հայոց Ցեղասպանութեան 100-րդ տարելիցին նուիրուած բանաձեւ, որ վկայակոչելով ՄԱԿ-ի Գլխաւոր վեհաժողովին կողմէ 9 Դեկտեմբեր, 1948-ի «ցեղասպանութեան յանցագործութեան կանխարգելման եւ պատիժի» մասին համաձայնագիրը, Հայոց Ցեղասպանութիւնը ճանչցած երկիրներու օրէնսդիր ու գործադիր մարմիններու, ինչպէս նաեւ` միջազգային կազմակերպութիւններու որոշումները կը դատապարտէ ցեղասպանութիւններուն ժխտումը:
