2016-ին Եւրասիական տնտեսական միութեան (ԵՏՄ) երկիրներու հետ Հայաստանի առեւտրաշրջանառութիւնը աճած է աւելի քան 15 տոկոսով, իսկ հայկական ապրանքներու արտածումը եւրասիական շուկայ՝ 65 տոկոսով: Այս մասին, ըստ «PanArmenian.net»-ի, յայտարարած է Հայաստանի նախագահ Սերժ Սարգսեան Պիշկեքի մէջ կայացած Եւրասիական տնտեսական բարձրագոյն խորհուրդի նիստի ընթացքին:
Նիստին մասնակցած են նաեւ Պելոռուսի նախագահ Ալեքսանտր Լուքաշենքօ, Ղազախստանի նախագահ Նուրսուլթան Նազարբաեւ, Ղրղզիստանի նախագահ Ալմազբեկ Աթամպաեւ, Ռուսիոյ նախագահ Վլատիմիր Փութին եւ նիստին հրաւիրուած Մոլտովայի նախագահ Իկոր Տոտոն: Նիստին ներկայ էր նաեւ Եւրասիական տնտեսական յանձնաժողովի նախագահ Տիգրան Սարգսեան:
