ՀՀ կառավարութեան երէկուան նիստէն ետք ՀՀ տնտեսական զարգացման եւ ներդրումներու նախարար Սուրէն Կարայեան լրագրողներու հետ զրոյցի ժամանակ ըսաւ, որ այս տարի կը նախատեսուի Հայաստանի մէջ կատարել 850 միլիոն տոլարին համարժէք ներդրումներ:
«3,2 միլիառի մասին յայտարարուած է ու ատիկա քանի մը տարուան ծրագիր է: Այս տարի կը նախատեսուի, որ ըլլան 850 միլիոն տոլարին համարժէք ներդրումներ, որոնց ֆինանսական աղբիւրներն ու իրականացնողները արդէն յստակ են: Ինչպէս կը տեսնէք, արդէն շատ աշխոյժ ներդրումային ծրագիրները կը քննարկուին եւ ներդրումներ արդէն իսկ իրականացուած են»,-ընդգծած է նախարարը:
Ըստ Սուրէն Կարայեանի` հիմնական ներդրումները պիտի իրականացուին ուժանիւթի, հանքարդիւնաբերութեան, թեթեւ արդիւնաբերութեան, դեղագործութեան եւ սնունդի վերամշակման ոլորտներուն մէջ:
