ՀՀ մշակոյթի նախարարութեան աջակցութեամբ, երէկ՝ Ապրիլ 10-ին, ժամը 19:00-ին, Արամ Խաչատրեան համերգասրահին մէջ տեղի ունեցաւ «Կ’երդնում քեզ, իմ երկիր» խորագիրով բարեգործական համերգ` նուիրուած ապրիլեան պատերազմի հերոսներուն:
Ըստ ՀՀ մշակոյթի նախարարութեան փոխանցած տեղեկութիւններուն, Հայաստանի ազգային ֆիլհարմոնիք նուագախումբին նուագակցութեամբ՝ երգահան, ՀՀ ժողովրդական արթիստ Ռոպերթ Ամիրխանեանի հայրենասիրական ստեղծագործութիւններուն
կատարումով հանդէս եկան Հայաստանի պետական քամերային երգչախումբը (գեղարուեստական ղեկավար եւ խմբավար` Ռոպերթ Մլքէյեան), Երեւանի պետական քամերային երգչախումբը (գեղարուեստական ղեկավար եւ խմբավար` Յարութիւն Թօփիկեան), «Հովեր» պետական քամերային երգչախումբը (գեղարուեստական ղեկավար եւ խմբավար` Սոնա Յովհաննիսեան):
Համերգը ղեկավարեց Հայաստանի պետական ֆիլհարմոնիք նուագախումբի գեղարուեստական ղեկավար եւ գլխաւոր խմբավար Էդուարդ Թօփչեան: Կատարումներով հանդէս եկան մեներգիչներ` Գուրգէն Բաւէյեան, Աննա Աւդալեան, Էմմա Պետրոսեան, Լէյլա Սարիբեկեան, Վահէ Հախուերտեան:
Երեկոյի ընթացքին հնչեց յատուկ ապրիլեան պատերազմի հերոսներուն նուիրուած «Վրէժն արդար կանչի» երգը:
