40 տարուան պատմութիւն ունեցող լիբանանեան MEPTICO ընկերութիւնը, որ այսօր իր արտադրանքը կ’արտահանէ ափրիկեան, եւրոպական եւ արաբական աւելի քան 35 երկիր, մտադիր է ձեռնարկութիւն հիմնել Հայաստանի մէջ եւ արտադրանքը արտահանել ԵԱՏՄ շուկայ: Այս մասին կը տեղեկացնեն ՀՀ տնտեսական զարգացման եւ ներդրումային նախարարութեան մամուլի ծառայութենէն:
Նախօրէին նախարար Սուրէն Կարայեան ընդունած է լիբանանեան MEPTICO եւ Երեւանի մէջ գործող Ice House ընկերութեան ներկայացուցիչները: MEPTICO ընկերութեան ներկայացուցիչները նախարարին ծանօթացուցած են ընկերութեան գործունէութեան` ներկայացնելով արտադրութեան տեսականին` հիւթեր եւ աղանդներու փոշիներ, խմորեղէնի խառնուրդներ, մածուկներ:
Համեմատական ծառայութիւններ մատուցող Ice House ընկերութեան ներկայացուցիչը, իր հերթին, համառօտ կերպով տեղեկացուցած է Հայաստանի եւ շարք մը այլ երկիրներու մէջ, ներառեալ Ռուսիոյ, ընկերութեան գործունէութեան մասին եւ պատրաստակամութիւն յայտնած համագործակցելու լիբանանեան ընկերութեան հետ` կազմակերպելով վերջինիս արտադրանքին իրացումը ՌԴ շուկային մէջ յայտնի առեւտրական ցանցերուն միջոցով:
Սուրէն Կարայեան ողջունած է գործարարներուն մտադրութիւնը եւ վստահեցուցած, որ նախարարութիւնը պատրաստ է ուղղորդելու եւ աջակցելու իրենց` ներկայացուած գաղափարը իրականացնելու համար:
