Արցախը զանազանութիւն կը մտցնէ զբօսաշրջութեան ոլորտնի մէջ. կրօնական ուղղութիւնը զարգացնելէ բացի, զարկ կը տրուի զբօսաշրջութեան ոլորտին մէջ պատմամշակութային վայրերը իբրեւ զբօսաշրջային արդիւնք ներկայացնելու գործընթացին:
Ըստ Artsakhpress.am-ի՝ Արցախի Հանրապետութեան տնտեսութեան նախարարութեան զբօսաշրջութեան վարչութեան ծրագրերու կառավարիչ Իննա Սիմոնեան նշած է, որ վերջին տարիներուն այդ ուղղութեամբ կատարուած աշխատանքը կու տայ է իր արդիւնքը: Այսօր համապատասխան ենթակառուցուածքներ ունեցող բազմաթիւ պատմամշակութային վայրեր կ’ունենան զբօսաշրջային մեծ հոսք:
«Որեւէ յայտնի պատմաշակութային վայր` ըլլայ Գանձասարը, Տիգրանակերտը, Ամարասը, տարուան ընթացքին կ’ընդունի բաւական մեծ թիւով զբօսաշրջիկներու հոսք: Եթէ հինգ տարի առաջ ունէինք մասնաւորապէս կրօնական ուղղուածութեան յուշարձաններ՝ եկեղեցիներ, վանքեր, ուր կ’այցելէին զբօսաշրջիկներ, այսօր, սակայն, Արցախի մէջ զբօսաշրջային արդիւնքը բաւական զանազանեցուած է: Տիգրանակերտի պետական պատմամշակութային արգելոցին մէջ, Տողի մելիքական ապարանքին մէջ, Հունոտի կիրճին եւ այլ վայրերու մէջ ստեղծուած են բարենպաստ պայմաններ, կան համապատասխան ենթակառուցուածքներ, կ’իրականցուին բարեկարգման աշխատանքներ, որ կը նպաստէ զբօսաշրջիկներու այցին»,- ըսած է ան:
Պատմամշակութային վայրերը զբօսաշրջութեան ոլորտին մէջ իբրեւ առանձին արդիւնք ներկայացնելու համար՝ այս տարի նախատեսուած է զգալի աշխատանք: Արցախի շարք մը պատմամշակութային վայրերու մէջ ենթակառուցուածքներու զարգացման համար նախատեսուած են ծրագիրներ, հաստատուած Արցախի կառավարութեան կողմէ:
2017 թուականին կառավարութեան հաստատած ծրագիրին ծիրէն ներս պիտի իրականացուին Տող գիւղի պալատական համալիրի եւ շրջակայ տարածքի վերականգման ու բարեկարգման աշխատանքներ: Ուշադրութեան կիզակէտ պիտի ըլլան նաեւ Տումի գիւղի Ս. Յովհաննէս եկեղեցւոյ վերականգնման, ինչպէս նաեւ Ասկերանի բերդի պահպանման աշխատանքները: Միաժամանակ պիտի կատարուին յուշարձաններու մաքրման, անոնց տարածքներու բարեկարգման եւ կազմակերպման աշխատանքներ: Իննա Սիմոնեան տեղեկացուցած է, որ Ասկերանի բերդի պահպանման աշխատանքները արդէն ընթացքի մէջ են:
2016 թուականէն ի վեր յուշարձաններու վերականգնման ոլորտին մէջ աշխատանքներ տարուած են Տող գիւղին մէջ` «Տողի մելիքական ապարանք» պետական պատմամշակութային արգելոցի տարածքին եւ Ասկերանի բերդին մէջ:
Հայ Առաքելական եկեղեցւոյ Արցախի թեմի միջնորդութեամբ եւ բարերարներու միջոցներով վերականգնուած են Շահումեանի շրջանի Դադիվանքի շրջակայքը գտնուող 4 մատուռներէն 2-ը, իսկ միւս մատուռներու եւ Դադիվանքի գլխաւոր մուտքի վերականգնման աշխատանքները կը շարունակուին եւ աւարտին պիտի հասցուին 2017 թուականին:
Իննա Սիմոնեան նշած է, որ իրենց ուշադրութեան կեդրոնին է նաեւ բնութեան վայրերու զբօսաշրջութեան զարգացման հարցը: Այդ նպատակով կը շարունակուի համագործակցութիւնը «Հայաստանի զարգացման նախաձեռնութիւններ» հիմնադրամին հետ: Խնդիր դրուած է բարենպաստ պայմաններ ապահովել ներդրողներու համար:
