«Հնչող կտաւներ» իւրայատուկ նախագիծին ծիրէն ներս, Ապրիլ 2-ին, Քրեմլինի մէջ պիտի իրականացուի հետաքրքրական համերգային ծրագիր: Այս մասին կը հաղորդէ Armenpress.am-ը՝ վկայակոչելով ռուսական լրատուամիջոցը։
Ծովանկարիչ Յովհաննէս Այվազովսկիի կտաւները «պիտի կենդանանան» հանրայայտ տուտուկահար Ճիւան Գասպարեանի տուտուկի հնչիւններուն ներքոյ:
Ճիւան Գասպարեանի հետ բեմի վրայ պիտի ըլլան նաեւ անոր թոռնիկը Ճիւան Գասպարեան-կրտսերը, Արմէն Ղազարեանը, Վազգէն Մարգարեանը, ինչպէս նաեւ «Բելկանտօ» եռեակը` (երգեհոն, տուտուկ, սաքսոֆոն):
Անոնք պիտի ներկայացնեն հայկական ժողովրդական մեղեդիներ, համաշխարհային դասական երաժշտութեան գլուխ գործոցներ` Վիվալտի, Շուպերթ, Ռախմանինով:
