*ՀԱՄՕ ՄՈՍԿՈՖԵԱՆ*
Այս օրերուն ամբողջ աշխարհը եւ մանաւանդ Միջին ու Մերձաւոր Արեւելքը պատերազմներու, սպանդներու, բնաջնջումներու գործընթացներու մէջ մխրճուած է։ Հեռատեսիլի թէ համացանցի էջերուն վրայ ականատես կ’ըլլանք մանուկներու, կանանց թէ ծերունիներու գլխատման, ռմբահարման, տղամարդոց խմբային գնդակահարման, թաղամասերու, գիւղերու, քաղաքներու մասնակի թէ ամբողջական կործանման՝ գերարդիական զէնքերով, հրթիռներով, ռազմական ինքնաթիռներով, անօդաչու սարքերով, անթիւ-անհամար զոհերով եւ աւերածութեամբ, «սովորական» երեւոյթ դարձած են։ Այս բոլորին մէջ, անամօթաբար մահազդու զէնքերու գովազդները մեծ զարկ ստացած են ու մեծ թէ փոքր պետութիւնները մրցավազքի մէջ են, իբրեւ զէնքերու վաճառքի լկտի վաճառականներ, գունազարդ ամսագիրներով եւ «շապիկաւոր» հրատարակութիւններով՝ այսօր աշխարհին կը ներկայացնեն իրենց հրաշալի՜ արտադրանքը, որոնցմով կարելի է գետնին հաւասարեցնել ամբողջ քաղաքակրթութիւններ…
Բնութեան մէջ ամէնէն արիւնախում եւ վայրագ կենդանին, ինչպէս կը պարզուի, մարդ արարածն է եղեր… փոխանակ արուեստն ու գրականութիւնը զարգացնելու, սերունդներ դաստիարակելու՝ համամարդկային արժէքներու պահպանման եւ գոյատեւման համար, այսօր ցեղապաշտութիւնը, կրօնական ծայրայեղականութիւնը, անհանդուրժողականութիւնը կը քաջալերուի ամէնուրեք, առանց հասկնալու, թէ մեր երկրագունդը ունի իր սահմանները այս ամէն կարգի թունաւորումները զանգուածային բնաջնջման զէնքերու գործածութեան պատճառած ահաւոր վնասները «բուժելու», որուն արդիւնքը՝ ինչպէս կը տեսնենք, պիտի ըլլայ բնական աղէտներու ահազդու շարան եւ երկիր մոլորակի անվերադարձ կործանում։
Այսօր, քարուքանդ կ’ըլլայ բազմահազարամեայ քաղաքակրթութեան օրրան Իրաք-Միջագետքը եւ աշխարհի ամէնէն հին քաղաքներու սրբավայր Սուրիան։ Վտանգը միշտ կը թեւածէ Լիբանանի վրայ, իսկ քիչ մը անդին, նոյնպէս բազմահազարամեայ քաղաքակրթութիւն ունեցող Եմէնի խիզախ ժողովուրդը, կոտորածներու եւ ցեղասպանութեան կ’ենթարկուի յղփացած արքայիկներու եւ իշխանիկներու որոշմամբ, որոնք միլիառաւոր տոլարներու հասնող հասոյթը, քարիւղէն եւ այլ հանածոներէն, անմտաբար կը մսխեն բազմատեսակ զէնքերու եւ մարդասպանութեան միջոցներու վաճառքի ու գնման մէջ։ Համաճարակներն ու երաշտը կը փոթորկի Ափրիկէի մէջ, որուն ոսկին եւ ադամանդը, անհատնում հարստութիւնները կը թալանուին, իսկ խեղճ բնակչութիւնը՝ խալխլած նաւակներով կը փորձէ օգնութիւն եւ մարդավայել կեանք փնտռել Եւրոպայի մէջ։
