Հայաստանի մէջ պարտադիր ժամկէտային զինծառայութեան ենթակաները, իրենց կամքով, պիտի ստանան պայմանագրային զինուորական ծառայութեան մէջ ներգրաւուելու հնարաւորութիւն։
Հնարաւորութիւնը սահմանուած է Հայաստանի մէջ պայմանագրային զինծառայութեան հնարաւորութիւններու ընդլայնման վերաբերեալ ՀՀ պաշտպանութեան նախարարութեան նոր ծրագիրով: Այս մասին, ըստ Armenpress.am-ի, յայտնած են ՀՀ պաշտպանութեան նախարարութենէն` մեկնաբանելով նախարար Վիգէն Սարգսեանի յայտարարութիւնը, որ նախարարութիւնը աւարտին հասցուցած է ծրագիր մը, որմով կը նախատեսուի ընդլայնել պայմանագրային զինծառայութեան հնարաւորութիւնները:
Ծրագրի ներդրման նպատակն է զարգացնել պայմանագրային զինծառայութեան համակարգը, ստեղծել աւելի արհեստավարժ բանակ եւ աւելցնել մարտական հերթապահութեան գործընթացին մէջ պայմանագրային զինծառայողներու ներգրաւուածութիւնը:
«Զինծառայողներու դրամական ապահովութեան չափերը կը սահմանուին համապատասխան տարուան պետական պիւտճէի եւ միջնաժամկէտ ծախսային ծրագրի հնարաւորութիւններուն ծիրէն ներս»,- ըսած են նախարարութենէն՝ անդրադառնալով այն հարցին, թէ ծրագրի ներդրումը կ’ենթադրէ՞ պայմանագրային զինծառայողներու աշխատավարձերու բարձրացում։
«Մենք այժմ աւարտական փուլին կը հասցնենք պայմանագրային ծառայութեան հնարաւորութիւնները ընդլայնելուն վերաբերեալ ծրագիրը, որ, վստահ եմ, մեծ ոգեւորութեամբ պիտի ընդունուի մեր հասարակութեան կողմէն»,- նշած է Վիգէն Սարգսեան:
