Թուրքիոյ Հանրապետական ժողովրդային կուսակցութեան ղեկավար Քեմալ Քըլըճտարօղլու սահմանադրական փոփոխութեանց հանրաքուէի ընտրարշաւին ընթացքին այցելած է Տենիզլի, որուն Չարտաք գիւղաքաղաքի սրճարաններէն մէկուն մէջ զրոյց ունեցած է տեղացիներու հետ: Այս մասին կը հաղորդէ պոլսահայ «Մարմարա» թերթը՝ նշելով, որ տեղացիներէն մէկը անակնկալ հարցում մը ուղղած է Քըլըճտարօղլուին` ուզելով գիտնալ, թէ Գերմանիոյ մէջ Քըլըճտարօղլու ինչո՞ւ սեղմած էր ձեռքը Կանաչներու կուսակցութեան համանախագահ Ճեմ Էօզտեմիրին, որ ճանչցած է Հայոց Ցեղասպանութիւնը:
Քըլըճտարօղլու պատասխանած է, որ ատիկա շատոնց տեղի ունեցած դէպք է, իսկ Ցեղասպանութեան ճանաչումէն ետք` ինք Էօզտեմիրին հետ կապ չէ ունեցած: «Չեմ հասկնա՛ր. ինչո՞ւ, ի՞նչ նպատակով այս հարցումը կ՛ուղղէք ինծի», աւելցուցած է Քըլըճտարօղլու: Մամուլը կը հաղորդէ, որ տեղացիները այդ հարցումէն ետք սրճարանէն դուրս հանած են հարցում ուղղողը, որուն անունը չէ հրապարակուած:
