Forbes հեղինակաւոր ամսագիրը Երկուշաբթի հրապարակած է տոլարային միլիառատէրերու ամենամեայ համաշխարհային ցուցակը:
Newsarmenia.am-ի հաղորդմամբ` ցուցակին մէջ ներառուած է ռուսաստանաբնակ երեք հայ գործարար: «Մագնիտ» մանրածախ առեւտուրի ցանցի հիմնական բաժնետէր եւ գլխաւոր տնօրէն Սերգէյ Գալիցկին (Յարութիւնեան) 6,9 միլիառ տոլար ունեցուածքով գրաւած է 212–րդ տեղը: «Տաշիր» ընկերութիւններու խումբի նախագահ եւ հիմնադիր Սամուէլ Կարապետեան 566–րդն է: Անոր ունեցուածքը կը գնահատուի 3,5 միլիառ տոլար: «Ռոսգոսստրախ» ընկերութեան նախագահ Դանիլ Խաչատուրով 2 միլիառ տոլարով զբաղեցուցած է 1066 տեղը:
Աշխարհի ամենահարուստ մարդոց մէջ 31–րդ վարկանիշը չորրորդ անգամ գլխաւորած է Microsoft–ի հիմնադիր Պիլ Կէյթս: Անոր ունեցուածքը աւելցած է` 75 միլիառ տոլարէն հասնելով 86 միլիառ տոլարի: Երկրորդը Berkshire Hathaway–ի ղեկավար Ուորէն Պաֆեթն է, որուն ունեցուածքը կը գնահատուի 75,6 միլիառ տոլար: Amazon–ի հիմնադիր Ճեֆ Պեզոս 5–րդ տեղէն տեղափոխուած է 3–րդ: Անոր ունեցուածքը գնահատուած է 72,8 միլիառ տոլար:
Forbes–ի ցուցակին մէջ առաջին անգամ միլիառատէրերու թիւը գերազանցած է երկու հազարը` կազմելով 2043 մարդ: Երկրագունդի ամենահարուստ մարդոց ընդհանուր ունեցուածքը աւելցած է 18 տոկոսով` հասնելով 7,67 թրիլիոն տոլարի:
