Վարչապետ Կարէն Կարապետեան շնորհաւորական ուղերձ յղած է Կանանց տօնին առթիւ:
Ինչպէս կը տեղեկացնէ կառավարութեան մամլոյ ծառայութիւնը, ուղերձի մէջ կ’ըսուի.
«Սիրելի՛ կանայք,
Սրտանց շնորհաւորում եմ ձեզ Կանանց տօնի կապակցութեամբ։
Գարնանային այս գեղեցիկ տօնի խորհուրդն իր մէջ ամփոփում է այն կարեւոր առաքելութիւնը, որ ունէք մեր կեանքում։ Այդ առաքելութեան շնորհիւ են ամբողջանում ու մեծարւում այնպիսի արժէքներ, ինչպիսին սէրն ու հաւատարմութիւնը, օճախն ու ընտանիքը։
Ձեր նուիրումի շնորհիւ են պահպանւում մեր ազգային լաւագոյն աւանդոյթները, հայ ընտանիքի ամրութիւնը, ձեր առաքինութեան շնորհիւ է մեզ շրջապատող աշխարհը դառնում բարի ու հանդուրժող, ներդաշնակ ու լոյսերով լի։ Միայն դուք կարող էք ընտանիքի հոգսերի ահռելի բեռ վերցնել ու միաժամանակ մնալ համակրելի ու գեղեցիկ։
Շնորհակալութիւն ձեզ իմաստութեան, համբերատարութեան ու հոգատարութեան համար, որ պահում ու պահպանում էք մեր ընտանիքները, որ մեր ազգի համար կիրթ ու հայրենասէր զաւակներ էք դաստիարակում, որ նեցուկ էք մեզ բոլոր օրերին:
Հաւասար հնարաւորութիւնների մեր դարում պակաս կարեւոր չեն նաեւ ձեր մասնագիտական ու աշխատանքային յաջողութիւնները, մեր երկրի արժանապատիւ քաղաքացի լինելու ձգտումը:
Թող ձեր կեանքում միշտ գարուն լինի՝ ծաղիկներով զարդարուած, եւ թող գարնանային այս գեղեցիկ տօնի տրամադրութիւնն ուղեկցի ձեզ ամբողջ տարուայ ընթացքում։
Ցանկանում եմ ձեզ ընտանեկան բարեկեցութիւն, երջանկութիւն ու լաւատեսութիւն, վառ ու արեւոտ տրամադրութիւն, ներշնչանք՝ լաւ ու բարի ձեռնարկումների համար։ Մենք հպարտանում են ձեզանով ու սիրում ենք ձեզ»։
