WWF-Հայաստանը` «Կարէն Դէմիրճեանի անուան Երեւանի Մեթրոփոլիթէն» ՓԲԸ աջակցութեամբ՝ Մարտ 3-ին բացումը կատարեց «Հայոց լեռների արքայ կովկասեան ընձառիւծ» խորագիրով ցուցահանդէս մեթրոփոլիթէնի «Երիտասարդական» կայարանին մէջ: Ցուցահանդէսը կազմակերպուած է «Հայաստանում կովկասեան ընձառիւծի պահպանութեան» ծրագիրի 15-ամեակին նուիրուած ձեռնարկներու ծիրէն ներս, որ կ’իրականացուի «Բնութեան համաշխարհային հիմնադրամի հայաստանեան մասնաճիւղ»-ի` WWF-Հայաստանի կողմէն: Այս մասին, ըստ Armenpress.am-ի, տեղեկացուցած է WWF-Հայաստանէն:
2002-էն սկսեալ Բնութեան համաշխարհային հիմնադրամը Հայաստանի մէջ կ’իրականացնէ այս կենդանատեսակի պահպանման ծրագիրը, որուն շնորհիւ կենդանին ոչ միայն վերադարձած է Հայաստան, այլ նաեւ արձանագրած է աճի դրական միտում: WWF-Հայաստանի «Կովկասեան ընձառիւծի պահպանութեան» ծրագրի համակարգող Արսէն Գասպարեան նշած է. «Ցուցահանդէսին նպատակն է բարձրացնել մարդոց իրազեկուածութեան մակարդակը մեր բնութեան զարդ հանդիսացող կովկասեան ընձառիւծին վերաբերեալ: Ամբողջ տարուան ընթացքին մենք մտադիր ենք իրականացնելու բազմաթիւ ձեռնարկներ, որոնք պիտի շարունակեն ներկայացնել ընձառիւծի նշանակութիւնը Հայաստանի բնաշխարհին համար»:
«Կարէն Դէմիրճեանի անուան Երեւանի Մեթրոփոլիթէն» ՓԲԸ տնօրէնի տեղակալ Գէորգ Աւետիսեան նշած է. «Մեզի համար շատ հաճելի էր նախաձեռնութիւնը եւ ուրախութեամբ համաձայնեցանք աջակցելու ցուցահանդէսի կազմակերպման: Ընդհանուր առմամբ, Երեւանի մեթրոփոլիթէնը կը խրախուսէ իւրաքանչիւր նախաձեռնութիւն, որ ունի կրթական եւ մշակութային նշանակութիւն»:
Ցուցահանդէսին ցուցադրուած լուսանկարները կը ներկայացնեն ընձառիւծի հիմնական ապրելավայրերը, որս հանդիսացող կենդանատեսակները (բեզոարեան այծ, հայկական մուֆլոն, այծեամ եւ այլն), ինչպէս նաեւ պահպանութեան ուղղուած շարք մը ձեռնարկներ:
Մարտ 3-ը վայրի բնութեան համաշխարհային օրն է, որուն նպատակն է բարձրաձայնել վտանգուած տեսակներու պահպանութեան կարեւորութիւնը ամբողջ աշխարհի մէջ:
Այս տարի օրուան կարգախօսն է «Լսէ՛ երիտասարդներուն ձայնը»` խրախուսելով մեր մոլորակի ապագայ առաջնորդ հանդիսացող եւ որոշում կայացնող երիտասարդները՝ պահպանելու վտանգուած վայրի բնութիւնը:
