Երէկ` Մարտ 6-ին, Արցախի մէջ տեղի ունեցած երկրաշարժի հետեւանքով մարդկային կորուստներ եւ աւերներ չկան, ճանապարհները նոյնպէս չեն վնասուած:
Այս մասին ֆէյսպուքեան իր էջին մէջ գրած է Արցախի Հանրապետութեան վարչապետի մամուլի քարտուղար Արտակ Բեգլարեանը: «Միայն կեդրոնին մօտիկ քանի մը գիւղի մէջ արձանագրուած են որոշ փոքր վնասներ, մասնաւորապէս` պատերու ճեղքերու յառաջացում կամ խորացում: «Իրավիճակը հանգիստ է, խուճապային տրամադրութիւններ չկան բնակչութեան մօտ»,- նշած է Բեգլարեան:
Նշենք, որ երէկ, տեղական ժամանակով ժամը 10:24-ին, ՀՀ արտակարգ իրավիճակներու նախարարութեան երկրաշարժի պաշտպանութեան ծառայութեան երկրաշարժագիտութեան ցանցին կողմէ արձանագրուած է հիւսիսային լայնութեան 40.180 եւ արեւելեան երկայնութեան 46.360 աշխարհագրական տուեալներով (ԼՂՀ, Քարվաճառ քաղաքէն 28 քմ. դէպի հիւսիս-արեւելք), օճախի 10 քմ. խորութեամբ, 3.4 աստիճանով երկրաշարժ մը:
Ըստ ՀՀ ԱԻՆ տեղեկութիւններուն, ստորգետնեայ ցնցման ուժգնութիւնը կեդրոնական հատուածին վրայ կազմած է 4-5 աստիճան:
