Արցախի Հանրապետութեան նախագահ Բակօ Սահակեան այսօր ընդունած է Հայաստանի արտաքին գործոց նախարարութեան կեդրոնական կառոյցի եւ դիւանագիտական մարմնի ներկայացուցիչները` արտաքին գործոց նախարար Էդուարդ Նալպանտեանի գլխաւորութեամբ:
Ըստ ԱՀ նախագահի պաշտօնական կայքէջին, հանդիպման անդրադարձ եղած է երկու հայկական Հանրապետութիւններու քաղաքականութեան, ազրպէյճանա-ղարաբաղեան հակամարտութեան կարգաւորման եւ տարածաշրջանային գործընթացներուն:
Բակօ Սահակեան նշած է, որ նման այցելութիւնները դարձած են աւանդական եւ կը կրեն պարբերական բնոյթ` կարեւորելով ատոնց նշանակութիւնը Արցախի եւ Հայաստանի արտաքին քաղաքական ոլորտին մէջ փոխգործակցութեան խորացման տեսանկիւնէ:
Հանդիպման ընթացքին Բակօ Սահակեան Արցախի Հանրապետութեան անկախութեան ճանաչման գործընթացին մէջ ունեցած նշանակալի աւանդին համար Հայաստանի արտաքին գործոց նախարարութեան համակարգի խումբ մը դիւանագէտներ պարգեւատրած է ԼՂՀ պետական պարգեւներով:
